Lonio lwa Sayuni.
52
1 Ee Sayuni, Yuka! Yuka! Vwala magala mobe! Yerusalema, u mwino wasililila, vwala nsulu zobe nsoga! Kubuno kutukila kano kaluma ntakeingila kobe utamonesibwa aba uli na nsese. 2 Yerusalema, ititule mukungu; yuka, ikala ga kisumbi! Kikumi kya Sayuni wakandilwe, ikandule bikando bya mu ikosi lyobe! 3 Kubuno Yehowa atenda bunee: “Mwikunzisizie buliabulia nu mwakululwe geteli bikulo.” 4 Kubuno Yehowa, Mwiya Bwangato Bunsania, atenda bunee: “Mu kulinga bantu bane bakumbile ku Misri buno beikale kuko anga bageni, kumbusa Asuria ababengile kuteli kabamba.” 5 Yehowa abuzia bunee: “Umpanga kano kaluma nili na kikizi gano, kubuno bantu bane bekilwe buliabulia? Nu babo bakubangata bakubanyega na moki mabibu.” Yehowa atenda bunee: “Izina lyane likulingwa kankanka musi unsania. 6 Ku kabamba kakano bantu bane bakamenya izina lyane; ku kabamba kakano bakamenya busi bubo, nne u watenda; ee, nne u wozo.”
7 Busoga bukizi bwa magulu ma wozo ukuvwa na musagu musoga, ukusambala bubobelelo; ukusambala musagu musoga wa bitondo bisoga, ukusambala lonio, ukusambalila Sayuni bunee: “Kalaga wobe u wangata!” 8 Iyuki lya balangi bobe! basakika iyuki, bakwimba gamozi na mbogimbogi; kubuno bamone na meiso mabo mu nkungu zasubye Yehowa ku Sayuni. 9 Inyuwe makindu ma Yerusalema, lalukazi bubibu na mbogimbogi, imbazi gamozi, kubuno Yehowa abobelezizie bantu bage, akulwide Yerusalema. 10 Yehowa abikile bwasi kuboko kwage kwasililila ku meiso ma baBilongo bansania; nu kuzinda kwa kisi kwamone ku lonio lwa Kalaga weitu.
11 Endazi, endazi, tukazi kuko, tamwitubye ku bintu bili na nsese; mutuke munkatini mwage, mwiyengie inyuwe bakweka bintu bya Yehowa. 12 Tondo tamwasasie kutuka, aba tamwende anga bakutina, kubuno Yehowa ende lwabusio lweinyu, nu Kalaga wa baIsraeli abe kumbusa kweinyu.
Tubebe nu bukindi bwa Mukiti wa Yehowa.
13 Lola, Mukiti wane akakita na menge; akaganunwa nu asakikwe kwigulu, nu we akaba kwigulu nunse. 14 Anga bubo beingi bangamine nage, kubuno malanga mage mabezaga mabigibwa kutinga muntu unsania, nu kilungi kyage ku lukita lwa bana ba bantu. 15 Ee, asalimie baBilongo beingi, bakota bakakanda tunua twabo; kubuno bitondo bibatasambalidwe bakabimona, nu bitondo bibatongule kubyo bakabimenya.