Beya bulili bagugumanibwa ku kukatizia Kalaga.
51
1 Inyuwe bakuyanga kwisanana, nnungwililazi; nu inyuwe bakuyanga Yehowa, lolazi lwanda lumwatikizibwe kulo kwa kubangula, nu lolazi muzinga u mwatikizibwe mugo ga mombagwa. 2 Lolazi Abrahamu, soinyuwe, nu Sara, wamubutile; ganamumanine, mu nkungu zezo abezaga wenyene tugu; namukasile mponga, namukitile kuba beingi. 3 Lebelebe Yehowa abobelezie Sayuni, alole makindu mage mansania nu kumakwila kyombo; akakita kalula kage kuba anga Edeni, nu kalula kage anga isoa lya Yehowa; mbogimbogi nu kuseka byamoneke mu lyo, nu kusima n'iyuki lya kwimba.
4 Bantu bane, nnungwililazi; nu kilongo kyane, tegekelazi kundi; kubuno mulembe ukatuka kundi, nu nimike ikakizio lyane kuba kyengi kya baBilongo. 5 Kwisanana kwane kuli bwigi, nu lonio lwane lwamonekile bwasi, nu maboko mane masungie baBilongo, bisanga byandindile nu bikakatizia kuboko kwane. 6 Galaminazi kwigulu, nu lolazi kisi gansi; kubuno meigulu makabomba anga muuki nu kisi kikaba mukungio, nubo beli munda nakyo bakue anga banyankondo. Tondo lonio lwane lukaba nu ku milyalya nu kwisanana kwane takuli na kuzinda.
7 Inyuwe bantu beizi bwisanana nu inyuwe bantu beli na mulembe wane mu mitima zeinyu, nnungwililazi: tamukue kuzuga kwa bantu boba, aba tamwange kulingana kwabo. 8 Kubuno kagembe kakabalia anga nsulu, nu kizu kikabalia anga nsulu za myoza; tondo kwisanana kwane kukaba nu ku milyalya, nu lonio lwane lwabe ku kibuti na kibuti.
9 Ee kuboko kwa Yehowa, yuka! Yuka! Ba na magala! Yuka anga ku kindi kikyo kya wakalazi, munkatini mwa bibuti bibyo bya wakalazi. Ndi ta Uwe u waketwide nyama nkali Rahabu byindi byindi? Ndi ta uwe u wabotwede zezo nzoka zakisimana? 10 Ndi ta uwe wakamizie kitatenge, nu mazi m'iziba inene? Ndi ntwatile maziba ma bitatenge kuba nzila buno bantu bakulwidwe batinge? 11 Bantu bakulwidwe na Yehowa bakasubya, bakabasa ku Sayuni na kwimba; mbogimbogi za milyalya zikaba gantata ga matoe mabo; bakamona kyelele nu mbogimbogi; kabebe nu kutonga bikatina.
12 Nne, aba nne nili We ukumubobelezia. Uwe u nazi buno ukue boba muntu ukakua, nu mwana wa muntu akakitwa anga bisugu? 13 Wibilide Yehowa, Mubumbi wobe, We u wanzile meigulu, nu kubika bibanza bya kisi. Nu uwe ukukua boba bindi binsania ku kabamba ka bongoa bukali bwa wozo ukukubenga, wozo uli kayikayika kubigia? Nu kuni kuli bongoa bukali bwa wozo ukukubenga? 14 Wozo wakandwa akasasia kukandulwa, nu ntakakua mu muzinga aba idia lyage talikakokoka. 15 Kubuno nne u Yehowa, Kalaga wobe, ukukitaga bimpumi bya kitatenge nu bimpumi byage kubila. Yehowa, Mwiya Mayombo u izina lyage. 16 Nabikile bitondo byane mu kanua kobe, nu nakukukide ku kilimelime kya kuboko kwane, nanzile igulu nu kubika kibanza kya kisi, nu kutenda ku Sayuni bunee: “Inyuwe muli bantu bane.”
17 Yuka! Yuka! Ee Yerusalema, emanuka! Uwe wanune kibangala kya bongoa bukali bwa Yehowa ku kuboko kwage. Wanune nu wasilile lupepe lwa kituma lwa kulebwalebwa. 18 Takuli umozi wakumusondelezia munkatini mwa bana bansania baabutile, aba takuli umozi wakukata kuboko kwage munkatini mwa bana bansania baalelile. 19 Bitondo bibino bibili byakubaside: kusigala ntuli na kampa nu kubiga, nu nzala nu mwene wa nganda. Nazi unakulilila? Nu nazi unakubobelezia? 20 Bana bobe bendile kalengwe; beiyombeka kuzinda kwa nzila nnene insania, anga mulume wa mubale mu bukila; beiyala na bongoa bukali bwa Yehowa nu kuzugila kwa Kalaga wobe.
21 Umpanga ku kabamba ka bitondo bibino, ungwilila kitondo kikino, uwe wasungizibwe nu kulebwa, tondo ta na maku: 22 Yehowa, Mwiya Bwangato Bunsania, Kalaga wobe ukulangaga bantu bage, atenda bunee: “Lola, natikya mu kuboko kwobe kituma kya kulusia katimbo; ntukanua lingo kibangala kya bongoa bwane bukali. 23 Nu nne nakibike mu maboko ma babo bakukusungia, u babo bakubulaga bunee: ‘Kumbama, tutinge gantata geinyu.’ Nu uwe wabikile mugongo wobe anga bilongo, anga nzila ku babo bakutinga.”