Bwisulilwa bwa nsake za baIsraeli.
50
1 Yehowa atenda bunee: “Kuni kuli mukanda wa kulekanuka wa nyoko u namukasile? Aba namukunzizie kwa nazi ku bantu bankasile nsombi? Lolazi, inyuwe mwikunzisizie mubenyene ku kabamba ka mibi zeinyu; lingo nyokoinyuwe amenkilwe ku kabamba ka bwagi bweinyu. 2 Kubuni nkungu zinavule takwabezaga muntu? Nkungu zinamanine kubuni takuli muntu wanitabide? Ndi kuboko kwane kuli kwigi buno nsinavwama kukukulula? Aba nsili na magala makukwonia? Lola, mu kuzuga kwane nkukamia kitatenge, nkukita nuuzi kuba kalula; byena byazo byabole ku kabamba ka kwida mazi, nu byo byakue na mpusia. 3 Nne navwalikya igulu na kwina, nu nne nakita nsulu za makunino kuba kyuki kyabo.” 4 Yehowa, Mwiya Bwangato Bunsania, ankasile lulami lwa babo bakwigisibwa, nimenye buni buninavwama kukasia ku bitondo byane wozo wakutilwe. Akuniyukya nindunindu na nindunindu, kuzibula matuzi mane nungwe anga bantu bakwigisibwa. 5 Yehowa, Mwiya Bwangato Bunsania, azibwide matuzi mane, nu nsyasombile aba nsyasubizie kumbusa. 6 Nabakasile mugongo wane nu babo bagulibulaga, nu matama mane babo bakutulaga luzelu lwane; nsyabisile malanga mane buno mumone nsoni nu kuswilwa matazi.
7 Tondo Yehowa, Mwiya Bwangato Bunsania, akankasia; ku kabamba kakano nsikamona nsoni, ku kabamba kakano nakandile malanga mane anga ikozi ibibu, nu nne nizi buno nsyamone nsoni. 8 Wozo ukunganza buno nisanana eli bwigi; nu nazi ukanenzia myango? Twemane gamozi. Nu nazi uli musongezi wane? Ankunde. 9 Lola, Yehowa, Mwiya Bwangato Bunsania, akankasia; nu nazi ukansungia buno nili mwagi? Lola, babo bansania babe mikungio za nsulu; kagembe kabalie.
10 Nu nazi munkatini mweinyu ukukua Yehowa boba, ukwanzaga iyuki lya mukiti wage? Wozo ukwenda mu kapilo aba nteli na kyengi, akatizie izina lya Yehowa, nu egamine ku Kalaga wage. 11 Lola, inyuwe bansania mwakongia keiya nu kwitimba na tumekemeke, endazi na magulu mu kyengi kya keiya keinyu, nu kya tumekemeke tumwabangizie. Mwabe na bitondo bibino mu kuboko kwane: mukeiyombeka na kabebe.