Mukiti wa Yehowa eli Mukuluzi wa baIsraeli.
49
1 Inyuwe ba bisanga, nnungwililazi. Inyuwe bantu beli bulazi, tegekelazi: Yehowa ammanine kutukila munda za mmane, ganabutilwe aninikile izina. 2 Nu We akitile kanua kane anga mwene mukali wa nganda. Ambisile munda mwa kilimelime kya kuboko kwage; nu We ankitile kuba musungu wasongoka; ambisile munda mwa kakunda kage ka misungu. 3 Ambwide bunee: “Uli mukiti wane, Israeli; muguli neiganune.” 4 Nu natendile bunee: “Nakambile buliabulia; nasilile magala mane buliabulia geteli mutali; tondo aba bubo lusungio lwane luli gamozi na Yehowa, nu lukalilo lwane luli gamozi na Kalaga wane.”
5 Nu kano kaluma Yehowa, atenda wozo Wambumbile kutukila munda buno nibe mukiti wage, nimuvwile na Yakobo lingo, buno nikundamanie baIsraeli kweli, kubuno naganunwe lwabusio lwa meiso ma Yehowa, nu Kalaga wane eli magala mane. 6 We atenda bunee: “Kili kitondo kikeke uwe kuba mukiti wane kusakika kilongo kya Yakobo, nu kusubania bonibwa ba Israeli; nakubike kuba kyengi kya baBilongo buno usambale lonio lwane aaba kuzinda kwa kisi.”
7 Yehowa, Mukuluzi wa Israeli, Wasililila wage, abula wozo wasombwa na bantu, ku wozo wasombwa na bantu nu kunyegwa na kilongo kikino, we uli mukiti wa bangati, abula bunee: “Bakota bakumone nu bemane; bana ba bakota bakukumbamine nu bo ku kabamba ka buno Yehowa uli Wisanana, Wasililila wa baIsraeli, akusombwede.”
8 Yehowa atenda bunee: “Mu nkungu ziwitabizibwa nakungule, mu busi bwa lonio nakukasizie; nu nne nakulange nu kukukasana kuba idagano lyane na bantu, kwimika kisi nu kupiena bupieni bwabezaga bwabiga, 9 nu kusambalila bakandwa: ‘Tukazi,’ nu babo beli mu kapilo: ‘Mwidolesie.’ Balie mu nzila, nu gantata ga biziki byasakama bamone byakulia. 10 Tabakue na nzala aba mpusia aba kiyugila aba musi tawabeite; We ukubakwila kyombo abeke nu Yehowa abasondelezie bwigi na tunuabalongo twa mazi. 11 Nu nne nakite miduko zane kuba nzila, nu nzila zane nnene zaganunwe insania. 12 Lola, babo bavwe kutuka bulazi, nu lola, kutuka ku lulenge lwa kwikazi kwa kisi, nu kutuka ku lulenge lwa kunsi kwa kisi, nu babo kutuka ku kisi kya Sinimu.”
13 Ee igulu, imbazi; ee kisi, bogazibogazi; ee miduko, lalukazi n'iyuki lya kwimba, kubuno Yehowa akubobelezia bantu bage, akwile bantu bage basungizibwe kyombo.
14 Tondo Sayuni atendile bunee: “Yehowa ansigile, Mukota anibilide.”
15 Mukikulu anavwama kwibilila mwana wage waakumomia, aba ntanakwila mwana wa nda zage kyombo? Ee banavwama kwibilila, tondo Nne nsikakwibilila. 16 Lola, nakusanzile mu makasa mane, bitutu byobe bili lwabusio lwane kankanka. 17 Bana bobe basasie kusubya; babo bakubigizie nu babo bakusigile nkubi bakutuka kuguli. 18 Lambula meiso mobe nu lola ku ndenge insania; bana bobe bansania bakundamana gamozi nu kuvwa kuguli. Yehowa atenda bunee: “Anga bunili mulami, lebelebe ukabavwala banse anga bya malebo, nu wikale nabo anga mukikulu ukusongwa.
19 Aba uli bukindu nu biziki byobe bili na mulali, nu kisi kyobe kyabigile, kano kaluma ukaba mukeke ku kabamba ka bantu bobe, nubo bakuzikizye bakaba bulazi, 20 bana buukamona kumbusa kwa kukua kwa bango bakatenda lingo mu matuzi mobe bunee: ‘Kiziki kikino kili kikeke nunsania kutuli; tukase kiziki twikale mukyo.’ 21 Kumbusa ukatenda mu mutima wobe bunee: ‘Nazi wambutide babano, nne nakwilidwe na bana bane, nu nabezaga nnenyene; nigizibwe nu nazangilezangile kuno nu kuko? Lingo nazi walelile babano? Lola, nasigilwe nnenyene; babano babezaga kuni?’”
22 Yehowa, Mwiya Bwangato Bunsania, atenda bunee: “Lola, nasakikile baBilongo kuboko kwane, nu kubikila baBilongo ibendela lyane, nubo bavwe na basikila bobe; babeeke ga makuba mabo, nu bakinga bobe babeeke gantata ga matuli mabo. 23 Nu bakota bakaba basoinyuwe bakumulisia, nu bakikulu babo bakamomia bana beinyu; bagoe bukukama nu balambe mukungu wa magulu mobe. Nu uwe wamenye buno We u Yehowa, kubuno babo bakundemanina tabakakua na nsoni.”
24 Ndi bakatikya bikagi byanyagwa ku mapuka? Aba bakandwa beisanana ndi bakonibwa? 25 Bulili, Yehowa atenda bunee: “Aba bakandwa ba mapuka batikibwe, nu bikagi byakunyangwa ku bita bya babo beli bakali byatikibwe; kubuno nasake na babo bakukusakya, nu nonie bana beinyu. 26 Nu babo bakukubenga nkabalisia na nyama zabo bobenyene; nu bakalebwa mu kunua mikila zabo bobenyene, anga ku maku m'ituba; nu bansania beli na mibili bakamenya buno nili Yehowa, Monia wobe nu Mukuluzi wobe, Mwiya bwangato wa Yakobo.”