BaIsraeli bamanwa kuba bakambi ba baBilongo.
48
1 Inyuwe ba numba za Yakobo, ungwililazi bitondo bibino; inyuwe bakumanwa mu izina lya Israeli nu inyuwe ba kikanga kya Yuda, bakulumbilaga mu izina lya Yehowa, nu kutekula Kalaga wa Israeli, tondo ta ku bulili aba ku kwisanana. 2 Mukwimana beya mwino wasililila, nu kwiyegamizia ku Kalaga wa Israeli; Yehowa, Mwiya Mayombo u izina lyage: 3 Nne nasambede bitondo byatingile kutukila wakalazi, nu byatukile mu kanua kane, nu nabilolesizie; nakitile kitangalabesi nu byabasile. 4 Kubuno namenyine buno uwe u mubibu, nu ikosi lyobe lili ikosi lya kyuma nu malanga mobe meli nsubi; 5 ku kabamba kakano nakusambede wakalazi; lwabusio lwa kubasa kwage nakulolesizie buno ntuvwame kutenda bunee: “Nkisi zane zakitile bitondo bibino; nkisi zane za kunyengulwa zabilagile.” 6 Mungule bitondo bibino; lola bitondo bibino binsania, nu inyuwe tamukubitabizia? Nakulolesizie bitondo bito mu nkungu zeno, nu bitondo byabisilwe aba bimutamenyaga. 7 Byabisulwa kano kaluma, aba ta wakalazi; nu lwabusio lwa busi bubuno bwa lelo ntungule misagu zabyo. Ububo ntunavwama kutenda bunee: “Lola twabimenyine.”
8 Ee ntungule, ee ntwamenyine; kutukila wakalazi kutuzi kobe takwazibwidwe; kubuno namenyine buno, uwe ukukita kubuteisanana nunsania, nu uwe wamaninwe munani kutukila kubutwa kwobe. 9 Ku kabamba k'izina lyane nakanda bongoa bwane; nu kulanga lutanuno lwane nkeizugila kuguli, buno nsikuzikye. 10 Lola, nakusugile, tondo ta anga feza; nakusombwede munkatini mw'iyambi lya lusungio. 11 Ku kabamba kane nnenyene nakite bitondo bibino; kubuni izina lyane libigibwe? Nu nne nsyakase ungo lutanuno lwane.
12 Ee Yakobo, nnungwililazi, nu Israeli u namanine: nne nili Kalaga; nne u Wakulinga nu nne u Wakuzinda. 13 Ee kuboko kwane u kwakitile kibanza kya kisi, nu kuboko kwane kwa seidume u kwanzile igulu; nkungu zinkuzimana nti zemana gamozi.
14 Inyuwe bansania, mwikundamanie, nu mungwilile; nazi munkatini mwabo wasambede bitondo bibino? We wasombolwa wa Yehowa akazindilizia lutundo lwage ku Babeli nu kuboko kwage kwabe gantata ga baKaldea. 15 Nne, aba nne natendile, ee namumanine; navule nage nu kumukasa bukindi mu nzila zage. 16 Nkundazi, ungwililazi bitondo bibino: kutukila kulinga nsyatendile kyampa ku lumbisombiso; kutukila nkungu zabasile bibyo bitondo nabezaga gago.
Kano kaluma Yehowa, Mwiya Bwangato Bunsania nu Muuza wage bansingile. 17 Yehowa, Mukuluzi wobe, Wasililila wa Israeli, atenda bunee: “Nne nili Yehowa, Kalaga wobe; nkukwigisagia buno ube na mutali; nkukusondelezagia mu nzila ziwatunganana kuyanga. 18 Songo wungwilide malagano mane, songo bubobelelo bwobe bunabede anga luuzi, nu kwisanana kwobe anga bimpumi bya kitatenge, 19 nu kibuti kyobe kinabede anga misege, nu babo bawabutile banabede beingi anga misege; meina mabo tamanatukile, aba kuzimina lwabusio lwane.”
20 Mutuke ku Babeli, tinazi kutuka ku baKaldea; lalukazi n'iyuki lya kwimba; sambalazi bitondo bibino, mubisambale aaba kuzinda kwa kisi, tendazi bunee: “Yehowa akulwide mukiti wage Yakobo.” 21 Nu tabakule na mpusia nkungu zabasondolezagia mu kalula; We abasizie mazi mu lwanda ku kabamba kabo; buligo, atile lwanda, nu mazi mabasile na magala.
22 Yehowa atenda bunee: “Takuli bubobelelo ku babi.”