Lusungio ku Babeli.
47
1 Ee kikumi, gela nu ikala mu mukungu! Mukinga wa Babeli, ikala gansi mu bisogo! Mukinga wa baKaldea, takuli kisumbi kya bukota, kubuno ntwamanwe lingo wola nu wabota. 2 Tola makozi ma kugoga, nu goga bunga; tikya kitambala nu bakamia nsulu, siga bilumbu bwasi, soka luuzi. 3 Mundulu wobe ukalolesibwa, ee nsoni zobe zamoneke. Nasube, nsyasigilile wampa. 4 Monia weitu, Yehowa, Mwiya Mayombo, lili izina lyage, eli Wasililila wa Israeli.
5 Ee mukinga wa baKaldea, ikala kibibi, ingila mu kapilo, kubuno ntwamanwe lingo mukikulu wa makota. 6 Nongedwe bantu bane nunse, u bupieni bwane nabubikile nsese, nabubikile mu maboko mobe; uwe ntwabakwilide kyombo; wabikile buzitu aba gantata ga bakulu nunsania. 7 Nu uwe watendile bunee: “Nne nkaba mukikulu mukota milyalya.” Aba ntwalangile bitondo bibino mu mutima wobe aba ntwakengede kuzinda kwabyo.
8 Uwe ukutunda bitondo bya mbogimbogi, kano kaluma umpanga ungwilila kitondo kikino: ukwikala geteli kumenyinina; ukutenda mu mutima wobe bunee: “Nne nili, aba takuli ungo gantata nne; nsikale anga musigala, aba kukwilwa na bana.” 9 Tondo bitondo bibino bibili byakukate ku nkungu emozi, mu busi bumozi, kukwilwa na bana, nu busigala; byakukate kilindiko kyazindilila, aba uli na bugila bwobe bwingi, nu buganga bwobe bwingi.
10 Kubuno walemaninne bubi bwobe, nu watendile takuli muntu ukummonako; menge mobe nu bumenyinino bwobe byakusubya kumbusa nu watendile mu mutima wobe bunee: “Nne nili, takuli ungo anga nne.” 11 Ku kabamba kakano bubi bwakukate; aba ntwamenye kiziki kibwakubasile; nu kubiga kwakubasile, ntwavwame kubutikya; nu kuzika kwakubasile kitangalabesi.
12 Emanuka lino na buganga bwobe, nu bwingi bwa bugila bwobe buwakambilaga kutukila bwana bwobe, embe unamona mutali, embe unavwama kwitia boba. 13 Wakutilwe na bwingi bwa nango zobe. Kano kaluma babo bakumenya menge ma nkeninkeni, nubo bakulola nkeninkeni, bakulengania na kubala kwa mwezi, bemanuke nu kukwonia ku bitondo bibino byakubasile. 14 Lola babe anga mampempe makama, keiya kabombole; tabeiyonie na magala ma ngulumina za keiya, takwabe ikala lya keiya lya kungwa, aba keiya ka kwikala bwigi nako. 15 Ee u bukaba babo baweisungagia nabo, bakitaga bukunza nobe kutukila bwana bwobe; bazangezange na muntu na muntu ku lulenge lwage; takwabe muntu wa kukwonia.