Tulaga twa Babeli twagoa.
46
1 Bali agoa gansi, Nebo akumbama, nkisi zabo bakuzekya nyama nu bituganwa, bakuzendia anga mizigo gantata nyama zakutwa. 2 Zagoa nu zakumbama gamozi; tazavwamine konia muzigo, nu bobenyene bendile ku bukobe. 3 Numba za Yakobo nu kibombo kyasigede kya baIsraeli, nnungwililazi, u inyuwe banekile kutukila meimi, nu banekile kutukila kubutwa, 4 nu aaba ku bukungu bweinyu nne u Kalaga, nu aaba mu nkungu za mbwe namulange inyuwe. Namukitile nu nne namweke; namulange nu namwonie.
5 Mwandingimanie na nazi? Nu mukukengela nili anga nazi? Aba nibe bulingilingi nage? 6 Bakulekelalekela olo zikutuka mu nsago, nu kulindika feza mu bilindiko, bakuliga mutumbi wa olo, azitulile nkisi, bagwede bukukama buno kuzikumbamina. 7 Batweka ga bituli, batweka nu kutwimika ga kiziki kyato; twemana gago nu tatukutuka ga kiziki kyato; nu umozi alile kuto, nu tatukwakula; tatukonia muntu na tubebe twage.
8 Kengelazi bitondo bibino, idolesiazi buno muli bamulume; mukengele bitondo bibino, inyuwe bagi. 9 Kengelazi bitondo bya wakalazi, mu nkungu za wakalazi kubuno nne u Kalaga, nu takuli ungo anga nne. 10 Nkusambala bitondo bya wakalazi kutukila kulinga, nu kutukila wakalazi bitondo bitekitwa, nkutenda bunee: “Lwango lwane lwemane nu nakite binsania byantananizia. 11 Namane kazoni kakali kutuka kuntata kukutukaga kisongo kya busi, nu kutuka ku kisi kya bulazi muntu ukakita lwango lwane. Ee, kinatendile nakizindilizie, nu linakengede nalikite. 12 Beinyuwe beli na mitima mibibu nu muli bulazi na kwisanana, nnungwililazi. 13 Nne nilusie kwisanana kwane bwigi, takwabe bulazi, nu lonio lwane talwizizie; nabike lonio lwane mu Sayuni, nu lutanuno lwane mu Israeli.”