Mukota Kiro, mukiti wa Yehowa.
45
1 Bitondo bibino u byatenda Yehowa ku Kiro u nabongezie mwambo wane bunee: “Namukatile mu kuboko kwage kwa seidume kugusia bilongo lwabusio lwage, nu kukokola bukota bwa bakota babo, nu kwigula nibi lwabusio lwage buno nibi tazakandwe; 2 nende lwabusio lwobe nu kubotya byatuntumana, nate nibi za nsubi nu kuketulaketula mingolo za nibi za byuma. 3 Nu nakukase isuku lya kapilo nu bikulo byabisilwe mu biziki bya kakungu, buno umenye nne nili Yehowa, Kalaga wa Israeli, ukukumana ku izina lyobe. 4 Ku kabamba ka Yakobo mukiti wane, nu Israeli musombolwa wane, nakumanine ku izina lyobe, nakwinikile izina lya lutanuno aba ntwammenyine. 5 Nne nili Yehowa, nu takuli ungo; takuli ungo Kalaga, tondo nne; nakandile kibunda kyobe nu ntwammenyine. 6 Bamenye kutukila kukya kwa busi aaba nu ku kuzinda kwabo, buno takuli ungo Kalaga, tondo nne. Nne u Yehowa nu takuli ungo. 7 Nne u wabumbile kyengi nu kapilo, Nne u ukukitaga bubobelelo nu kulusia bubi; Nne nili Yehowa, ukukitaga bitondo bibino binsania. 8 Inyuwe meigulu, lokazi gansi kutuka kwigulu, nu bimpa bikubule kwisanana; kisi kinsania kikandulwe nu kibe na lonio, nu kwisanana kwase gamozi. Nne, Yehowa nabibumbile.
9 Kabebe kweli ukwidingimania na Mubumbi wage! Luginga lumozi munkatini mwa nginga za kisi. Ndi ibumba linatenda wozo ukulibumba bunee: ‘Kikizi kyukukita?’ aba ndi mulimo wobe unatenda bunee: ‘Ntuli na maboko?’ 10 Kabebe kweli ukutenda isi bunee: ‘Akubuta kikizi?’ nu ukubula nina bunee: ‘Kikizi kiwabutile?’”
11 Yehowa, Wasililila wa Israeli nu Mubumbi wage, atenda bunee: “Ndi munambuzia misagu za bitondo bikaba? Ndi munambuzia misagu za bana bane nu milimo za maboko mane? 12 Nne u wakitile kisi nu kubumba muntu mukyo. Nne, na maboko mane nanzile igulu, nu nakakizizie mayombo makyo mansania. 13 Nasakikile Kiro mu kwisanana kwane, nu nisananie nzila zage insania; obake mwino wane nu akandule bakandwa bane, ta ku bukunza aba nkaso, u bwatenda Yehowa, Mwiya Mayombo.”
14 Yehowa atenda bunee: “Mulimo wa Misri nu bya bukunza bya Etiopia nu baSabea, u bantu balazi, basoke kuguli nu babe bobe nu bayange kumbusa kobe, bavwe mu makoki nu bakukumbamine, nu bakusime batende bunee: ‘Bulili, Kalaga eli munda mobe, aba takuli ungo, takuli ungo Kalaga.’”
15 Lebelebe uli Kalaga wibisa, ee Kalaga wa Israeli, Monia. 16 Bakiti ba nkisi bansania bakue na nsoni nu bazangezange, nubo bansania bende na nsoni. 17 Israeli akululwa na Yehowa na lonio lwa milyalya, tamwamone nsoni aba kuzangazanga aaba ku milyalya na milyalya. 18 Yehowa wabumbile igulu, u Kalaga wabumbile kisi nu kukikita, We u wakikokomezizie, ntakibumbile bulia, akibumbile buno bantu beikale mukyo; atenda bunee: “Nne u Yehowa nu takuli ungo. 19 Nsyatendile mu kakungu mu biziki bya kapilo bya kisi; nsyabwide kibuti kya Yakobo bunee: ‘Nnyangazi bulia.’ Nne Yehowa nkutenda bulili, nkutenda bili bulingilingi.
20 Ikundamaniazi nu muvwe, nu kundazi gamozi, inyuwe bonine kutuka ku baBilongo. Tabeli na menge bakwekaga nkisi za miti zabo zabazwa, nu kusega tulaga tutanavwama konia. 21 Sambalazi bitondo bikavwa, nu mukunde bwigi buno mukale lwango gamozi; nazi wasambede bitondo bibino mu nkungu za wakalazi? Nu nazi wasambede wakalazi? Ndi ta nne Yehowa? Nu takuli ungo Kalaga, umpanga nne; Kalaga wa bwisanana nu Monia, takuli ungo umpanga nne. 22 Inyuwe beli kuzinda kunsania kwa kisi, ndolazi nu mwonibwe, kubuno nne u Kalaga, nu takuli ungo. 23 Nalumbide mu kalamo kane nnenyene, kitondo kikutuka mu kanua kane mu kwisanana, aba takyasubye bulia kubuno lwabusio lwane buno n'izu n'izu lyakomwe, nu lulami na lulami na lwalumbile.”