Kalaga wa bulili nu tulaga twa buza.
44
1 Nu atendile lingo bunee: “Tondo ungwilila kano kaluma, ee Yakobo, mukiti wane, nu Israeli, u nasombwede. 2 Yehowa wakubumbile nu kukukita kutuka munda, We ukakukasia, atenda bunee: ‘Ntukue boba, Yakobo, u mukiti wane, nu uwe Yesuruni, u nasombwede. 3 Kubuno nakubule mazi gantata ga kisi kili na mpusia, nu nuuzi gantata ga kiziki kyakama; nakubule Muuza wane gantata g'ibuta lyobe, nu mponga zane gantata ga bana bobe. 4 Nubo bakule anga nsolu zili kuli mazi, nu anga nsekenseke zili mu ntungo mwa luuzi. 5 Umozi atende bunee: “Nne nili wa Yehowa,” nu ungo eimane wenyene ku izina lya Yakobo; nu ungo asanze na kuboko kwage bunee: “Nne nili wa Yehowa,” nu eimane ku izina lya Israeli.’ 6 Yehowa, Mwangati wa Israeli, nu Mukuluzi wage, Yehowa, Mwiya Mayombo atenda bunee: ‘Nne u wa kulinga, nu nne u wa kuzinda, nu gantata ga nne tageli ungo Kalaga. 7 Nazi uli anga Nne? Asole nu kubisambala, nu kubilongeka lwabusio lwane binsania byakitilwe kutukila ganabikile bantu bane ba wakalazi, nu bitondo bikuvwa, nu bitondo bikabasa abisambale. 8 Tamukue boba, nu tamugilimine. Ndi nsyamubwide inyuwe kutukila wakalazi nu kumusambalilabyo? Nu inyuwe muli balongeki bane. Ndi kuli kango Kalaga kantinga? Ee, takuli lungo Lwanda: nne nsizi ungo.’”
9 Babo bakubazaga nkisi, bansania beli bulia, nu byabo bibakwelama bili bulia; nubo bakubilongekela tabakumona aba tabakusongolola bili nsoni zabo. 10 Nazi walongekile kalaga kamozi, aba wanyengwide nkisi zabazwa zitakukita kampa? 11 Lola, bansania bakukita bubo bamone nsoni, nu babazi ba nkisi beli bantu tugu. Bakundamanibwe bansania gamozi, nu bemane, nu bakue boba, nu bakue na nsoni gamozi.
12 Mutumbi eli n'isaga, akutula na makala, akulilongeka na nondo, akulitula na magala ma kuboko kwage; tondo eli na nzala, nu magala mage makokoka; eli na mpusia, eida mazi, akutwa nunse. 13 Mukulumizi wa mbavu akutintia muzigi; akusanza na kiliyo; akulukulumizia na nkondo, nu akulusanza na musumali, nu akulukesa ku lukita lwa muntu anga kisusania kisoga kya muntu, wikale mu numba za kabwasa. 14 Akwisindila mierezi, akusombola embe mutiriza aba mwalo, akusombola munkatini mwa miti za lubanda; akuyika muvinje, nu mbula nti zawasia. 15 Kusila muti ukaba misali za kukongia keiya, nu atole kyindi kyago, nu kubangia keiya buno ongwe ko, nu na kyindi kyago akuyika kampampa; akugukita kalaga nu kukakumbamina nu kukita nkisi za buza, nu kuzikumbamina. 16 Akongia kyindi kyago mu keiya; nako ayika idia, nu kokya nyama zage, nu embuka nazo. Nu lingo ongwa keiya, nu kutenda bunee: “Nkungwa keiya, nkumona ku keiya.” 17 Nu ku kyindi kyasigala akikita kalaga, u nkisi zage za kubazwa; azikomena mazu nu kuzikumbamina nu kuzisega; atenda bunee: “Nonie kubuno uwe u kalaga kane.”
18 Tabeli na menge aba bumenyinino kubuno azibile meiso mabo tabamone, nu mitima zabo tazisongolole. 19 Nu takuli umozi ukubika mu mutima aba uli na menge aba bumenyinino kutenda bunee: “Nakongezie kyindi kyago ku keiya nu nayikile kampampa bubo, gantata makangania makyo nokezie nyama nu nalide, nu kyindi kyasigede, nakikita kuba kya kusombwa? Ndi nakome mazu lwabusio lwa kyindi kya muti?” 20 Akulia lwito; mutima wa bwengelezi wamuzimizia; ntanavwama kwiyonia, aba kutenda bunee: “Kikyo kili mu kuboko kwane kwa seidume, ta kili buza?”
21 Ee Yakobo, kengela bitondo; ee Israeli, kubuno uwe uli mukiti wane; nne Yehowa nakubumbile; ntukeibililwa na nne. 22 Nazimizie mibi zobe anga kimpa kizitu, nu bwagi bwobe anga lutundutundu; subya kundi kubuno nakukulwide.
23 Imbazi inyuwe igulu; kubuno Yehowa akitile bitondo bibino; ee inyuwe ndenge insania za kisi, mubogeboge; inyuwe miduko, lalukazi, nu lubanda lwa miti nu na muti na muti guli mulo! Kubuno Yehowa akulwide Yakobo nu alolesizie lutanuno lwage mu Israeli.
24 Yehowa, Monia wobe wakubumbile kutukila munda, atennda bunee: “Nne Yehowa wakitile binsania, nanzile igulu nu kisi nnenyene. 25 Nazimizie tukengelezio twabo babo beki ba buza, nu kubika bagila migazanga, nu nkusubania bantu ba menge lumbusambusa, nu kukita menge mabo kuba bukongolo; 26 nazindilizizie kitondo kya mukiti wane nu kuzindilizia lwango lwa migenzi zane lubatenda ku kabamba ka Yerusalema, buno mwikalwe na bantu nu ku kabamba ka makindu ma miino za Yuda bunee: ‘Nkamobaka lingo.’ 27 Nkutenda kitatenge bunee: ‘Kama, nu nne nakamie nuuzi zobe.’ 28 Nkutenda ku Kiro bunee: ‘Uli mulangi wane, nu akite binsania byantananizia; aba kutenda ku kabamba ka Yerusalema bunee: “Wobakwe,” nu ku zezo Numba za kukumbamina bunee: “Kibanza kyobe kyabikwe.”’”