Yehowa eli Mukuluzi.
43
1 Ee Yakobo, Yehowa Mubumbi wobe, nu uwe Israeli, We wakukitile, kano kaluma akutenda bunee: “Ntukue boba, kubuno nakukulwide, nakumanine mu izina lyobe, uli wane. 2 Nkungu ziwasoke kitatenge nabe gamozi nobe, nu mu nkungu za kusoka luuzi ntwakoke; gawende munkatini mwa keiya ntwagie, aba ndembelela za keiya tazakugisie. 3 Kubuno nili Yehowa, Kalaga wobe, nu Wasililila wa Israeli, Monia wobe; nakasile Misri kuba bukuluzi bwobe, nu Etiopia nu Seba ku kabamba kobe. 4 Kubuno uli wa bukuti bunene nu wanzwa lwabusio lwa meiso mane, nu nakutunda, nkakasana bantu ku kabamba kobe, nu bilongo bya bantu ku kabamba ka kalamo kobe. 5 Ntukue boba; kubuno nili gamozi nobe, nalusie kibuti kyobe kutuka kuntata kukutukaga kisongo kya busi, nu nakukundamanie kutuka kunsi kwa kisi. 6 Natende ku lulenge lwa kwikazi kwa kisi: ‘Babasie,’ nu ku lulenge lwa kwdume kwa kisi: ‘Ntubazibizie.’ Mulusie bana bane kutuka bulazi, nu bakinga bane kutuka kuzinda kwa kisi, 7 u bansania bamanwa mu izina lyane, banabumbile ku kabamba ka lutanuno lwane; nababumbile, ee nabakitile.”
8 Mubasie kumbuga beli na meiso tondo byuku, nu beli na matuzi tondo bimbula matuzi. 9 Bilongo binsania bikundamane, nu bikanga bya bantu bisanganane. Nazi munkatini mwabo unavwama kusambala kitondo kikino, nu kutumenyesia bitondo bya wakalazi? Balusie balongeki babo kulolesia buno beli beisanana, buno bongwe nu batende buno buligo.
10 Yehowa akutenda bunee: “Inyuwe muli balongeki bane nu mukiti wane, banasombwede buno mumenye nu kunkatizia, nu kusongolola buno nne nili Kalaga. Lwabusio lwane takwabumbilwe kalaga, aba kumbusa kwane takukaba kango kalaga. 11 Nne u Yehowa, nu geteli nne takuli ungo Monia. 12 Nasambede nu nonezie nu nalolesizie nkungu, nsili kalaga kageni keli munkatini mweinyu. Inyuwe muli balongeki bane, u bwatenda Yehowa, buno nne u Kalaga. 13 Ee, kutukila wakalazi, nne nili Kalaga. Aba takuli unavwama kutikya keli mu kuboko kwane. Ndi nakita mulimo, nazi unavwama kugunania?”
14 Yehowa, Monia weinyu, Wasililila wa Israeli, atenda bunee: “Ku kabamba keinyu nasingile aaba nu ku Babeli, nu Nne nabapumbizie anga batini, aba baKaldea, nu mu maato mabo manene mubakubogelabogela. 15 Nne nili Yehowa, Wasililila weinyu, Mubumbi wa Israeli, Mwangati weinyu.” 16 Yehowa, We wenyene u wakitile nzila munkatini mwa kitatenge, nu nzila za kutinga munkatini mwa luuzi lunene, 17 ukumana kayanga nu farasi, nu kibombo kya bakoloboyo nu mapuka ma bita gamozi; balambikwa gansi, tabemanuke, bazika anga lutambi: akutenda bunee:
18 “Ibililazi bitondo bya kulinga, aba tamukengele bitondo byatingile. 19 Lolazi, nakite kitondo kito; kano kaluma kyaswaga; tamwakimenye? Nate nzila aba munkatini mwa kalula, nu nuuzi mu kalula. 20 Nyama za mu kalula zannanze, mikala nu sulukutu, kubuno nkuzikasa mazi mu kalula, nuuzi mu kalula, kunusia bantu bane, basombolwa bane, 21 u bantu babo banabumbile ku kabamba kane, buno basambale nganuno zane.
22 Tondo ntwammanine, ee Yakobo; tondo wakutilwe na nne, ee Israeli. 23 Ntwamvwilide na byana bya mikoko bya bisansa byobe bya kugisibwa, aba ntwananzile na bisansa byobe; nsyakukandile ku nkaso aba nsyakukutizie ku nkaso za aliga. 24 Ntwankunzide bulago na feza nu ntwanikutizie ku manona mu bisansa byobe; tondo wambabazizie na bwagi bwobe, nu wankutizie na mibi zobe.
25 Nne, u We ukuzimagia mibi zobe ku kabamba kane nnenyene, nu nsyakengele lingo bwagi bwobe. 26 Nkengelezie, tukasane nsungio gamozi; sambala bitondo byobe, uvwame kuba na bwisanana. 27 So mutangi akitile bwagi, nu bakulumania bobe banagide nne. 28 Nu nne nongezie bana ba bakota ba kiziki kyasililila, nu nakasenne Yakobo kuba kiswililo nu Israeli kuba kilingano.”