Mukiti wa Yehowa.
42
1 Atendile lingo bunee: “Lola mukiti wane u nakata; musombolwa wane, natananizibwa nage, nu nabikile Muuza wane mweli, nu we abike bwisanana ku baBilongo. 2 Ntalile, nu ntalaluke aba ntamane mibila; iyuki lyage talyungubwe mu nzila nnene za mu miino. 3 Mukulu wakalikile ntakagukalikya lingo byindi byindi, ntakazimia lutambi lukubanga; alolesie kwisanana kwa bulili. 4 Ntakamenkula nu ntatambie mutima aaba nu abike kwisanana kwa bulili mu kisi; nu bisanga byalemanine milembe zage.” 5 Kalaga Yehowa, wabumbile igulu nu kulyanza; anzile kisi nu matubulo makyo; akukasa muuza ku bantu beli mukyo nu kalamo ku babo bakwenda mukyo, u watenda bunee: 6 “Nne, Yehowa, nakumanine mu kwisanana nu Nne nakukate ga kuboko kobe; nu nakulange, nu kukukasana ube idagano ku bantu nu kyengi ku baBilongo, 7 nu kuzibula meiso ma byuku, nu kutikya bakandwa ku bikando, nubo beli mu kapilo mu numba za kikando.
8 Nne nili Yehowa; u izina lyane, nu lutanuno lwane nsyalukase ungo, aba luganuno lwane ku nkisi zabazwa. 9 Lola, bitondo bitangi byabasile, nu Nne nasambale bitondo bito; lwabusio tabibasa namutonda inyuwe musagu wabyo.”
10 Mwimbile Yehowa lwimbo luto, nu nganuno zage kutuka ku kuzinda kwa kisi; babo bakwenda mu kitatenge bamuganune, nu binse bili mukyo, nu bisanga nu babo bakwikalaga mubyo. 11 Kalula nu miino zako zilaluke na moki mabo, nu miino mikeke zikalilwa na baKedari; beiya Sela beimbe na mbogimbogi basakike moki mabo gantata miduko. 12 Baganune Yehowa, nu kutenda lutanuno lwage ku bisanga. 13 Yehowa abase anga ipuka; ayukye lugi anga muntu wa bita; alaluke na kakemi ka bita; alolesie magala ku beiti bage. 14 Bindi byingi nikede kibibi, nabobelede, nikandile; tondo kano kaluma nalile anga mukikulu mu nkungu zage za kubuta, nabulute mwizo nu nagubasie gamozi. 15 Nabigie miduko nu twiduko, nakamie bisugu byazo binsania, nagalukye nuuzi kuba bisanga, nu nakamie maziba ma luuzi. 16 Nalusie byuku mu nzila zibatakumenya, mu nzila zibeteizi nabasondelezie; nabike kapilo kuba kyengi lwabusio lwabo, kiziki kyatimba kisanane; bitondo bibino nabakitile nu nsyabasige. 17 Basubibwe kumbusa nu bamone nsoni ningi, babo bakukumbamina nkisi zanyengulwa, nu kuzilemanina buno zibe tulaga twabo.
18 Ungwililazi, beinyuwe bimbula matuzi; nu mulole, beinyuwe byuku, mumone. 19 Nu nazi uli kyuku, umpanga mukiti wane? Nazi uli kimbula matuzi, anga mugenzi wane u nasingile? Nu nazi uli kyuku, anga uli na bubobelelo na nne, nu kyuku anga mukiti wa Yehowa? 20 Walolile ku bitondo byingi, tondo ntwabimonine, nu matuzi meli bwasi tondo ntukungwa.
21 Yehowa atananinwa ku kabamba ka bulili bwage, aganune mulembe nu kugukita kuba na lwanzo. 22 Tondo bantu babano banyagwa nu baba bakobe, banse bakoloka mu mizinga, nu babisilue mu numba za bikando; babezaga bategwa, aba takuli wabonezie; beseli anga bikagi byanyagwa, aba takuli watendile bunee: “Basubanie.” 23 Nazi wamumuli ukungwilila na matuzi mage bitondo bibino? Nazi ukungwa aba kungwilila mu nkungu zikavwa? 24 Nazi watolile Yakobo kuba anga kikagi kya kunyagwa, nu kubika Israeli ku banyagi? Ta we Yehowa? Ta Yehowa u twagide? Kubuno tabazigile kwenda mu nzila zage, aba tabanzile mulembe wage. 25 Ku kabamba kako akubwide bukali bwa bongoa bwage gantata gabo nu magala ma bita, nu keiya kagulumine kabatimbile ndenge insania, aba bubo tabamenyine, nu kabagisizie, tondo tababikile bitondo bibino mu mutima wabo.