Mukasia wa baIsraeli.
41
1 Inyuwe ba bisanga, ikalazi kibibi lwabusio lwane! nu baBilongo babe na magala mato. Bakundamane gamozi nu batende buno tukundamanazi gamozi ku lusungio. 2 Nazi wemanukizie umozi kuko kukutukaga kisongo kya busi, wamumanine mu bwisanana mu mulimo wage? Yehowa akasana baBilongo lwabusio lwage, nu kusigulizia bakota lwabusio lwage; abakitile kuba mukungu na mwene wage wa nganda, nu kubalengia anga mintula na bunta bwage. 3 Abayangile nu kutinga na bubobelelo, mu nzila zitanyantile lingo magulu mage. 4 Nazi wakitile nu kulongeka bitondo bibino, kumana bibuti mu kulinga? Nne, Yehowa, u Mutangi nu Muzinda, nne nili We.
5 Bisanga byamonine, byakule boba, kuzinda kwa kisi kwatengiletengile, bakundile nu bavule. 6 Bakasanizie nawe na munyage, nawe watendile munyage bunee: “Ba na magala.” 7 Mukulumizi akokomezia mutima wa mutumbi wa olo; wozo ukubotya na nondo akokomezia wozo ukulibula gantata g'ikozi ly'itulilo; akutenda ku mulimo wa kukulumania bunee: “Uli mulimo musoga.” Nu we alimbanie nkisi na misumali buno tazitengetenge.
8 Tondo uwe, Israeli, mukiti wane, Yakobo, u nasombwede, u kibuti kya Abrahamu, kilemba kyane, 9 nakutikizye kutukila kuzinda kwa kisi, nu kukumana kutukila myaga zakyo, nu nakutendile bunee: “Uwe uli mukiti wane, nakusombwede aba nsyakutezile. 10 Ntukue boba, nili gamozi nobe; ntuzangezange kubuno nili Kalaga wobe, nakukase magala, nu nakukasie, bubo nakukate mu kuboko kwane kwa seidume mu bulili bwane.
11 Lola, banse babezaga na bongoa kuguli babe na nsoni nu bazangezange; nu babo bakukulwania babe buliabulia nu babigibwe. 12 Wabalonde nu ntwabamone, aba babo bakwitana nobe babe anga buliabulia; babo bakukita bita nobe tababe kampa. 13 Kubuno nne, Yehowa, Kalaga wobe, nakukate ku kuboko kwobe kwa seidume, nakubule bunee: ‘Ntukue boba, nakukasie. 14 Ntukue boba, uwe munsobobo Yakobo, nu uwe Israeli u kilongo kikeke, nakukasie.’ Yehowa, Mukuluzi wobe nu Wasililila wa Israeli, atenda bunee: 15 ‘Lola, nakukite kuba kitulwa kito nu kikali kili na meinyo kya kususula makanda. Wasusule miduko nu kuzibungula, nu uwe wakite miduko kuba mpepa. 16 Wazipepe, nu lumpumpu lwazilengie, nu kisoa kyazandabanie; tondo wabogeboge mu Yehowa, witanune mu Wasililila wa Israeli.’
17 Muzambi nu mwiyanizi bakulonda mazi, tondo mazi meida; ndami zabo zakama na mpusia, nne Yehowa nabongwe; nne Kalaga wa ba Israeli, nsyabasige. 18 Nakandule nuuzi mu biziki byasakama, nu tunuabalongo munkatini mwa bisasa; nagalukye kalula kuba kiziba kya mazi, nu kisi kyakama kyabe tunuabalongo. 19 Nayike mu kalula miti za muerezi nu mushita nu muhadasi nu mbono; nabike mu kalula miti za muberoshi nu musunobari nu muteashuri gamozi, 20 buno bamone nu bamenye, nu bakengele, nu basongolole gamozi, buno kuboko kwa Yehowa u kwakitile kitondo kikino, nu buno Wasililila wa Israeli u wabibumbile."
21 Yehowa atenda bunee: “Lusiazi bitondo byeinu, mutende tubamba tweinyu tuli tubibu, u bwatenda Yehowa, Mwangati wa Yakobo. 22 Bilusiazi nu kutumenyesia bitondo bikavwa; batulolesie byatingile, buno tubilange mu mitima, aba mutusambalile bitondo bikavwa. 23 Mutumenyesie bitondo bikaba lwabusio, buno tumenye buno inyuwe muli tulaga; ee, kitazi busoga aba kitazi bubi, aba twangame nu tubilolazi gamozi. 24 Lolazi, inyuwe muli buliabulia nu milimo zeinyu tazili kena, wozo ukumusombola eli mubi.
25 Nasakikile muntu ku lulenge lwa kwikazi, nu akuvwa; kutukila kukutukaga kisongo kya busi, nu kutukila kuko amane izina lyane; nu we avwe gantata ga bana ba bakota anga kunyanta bisogo, nu anga mubumbi w'idega akupota ibumba.
26 Nazi walolesizie musagu kutukila kulinga, buno tumenye? Nu wakalazi, tuvwame kutenda bunee: ‘We eli wisanana?’ ee, takuli wampa watulolesizie; ee, takuli umozi watusambalide bitondo byobe; ee takuli wampa wungule ku bitondo byobe. 27 Nne u mutangi kutenda ku Sayuni: ‘Lola, beli kuno!’ nu nakasile ku Yerusalema umozi wavwe na musagu musoga. 28 Nu nalolile, nu takwabezaga muntu; munkatini mwabo tamuli musunguzi; ndi namubuzia, nti takuli wampa wa kunakula kitondo. 29 Lola, babo bansania beli buliabulia, milimo zabo tazili kena; nkisi zabo za kunyengula zili lumpumpu nu buliabulia.”