Bitondo bya bubobelelo bya Yehowa.
40
1 Kalaga weinyu akutenda bunee: “Bobeleziazi, bobeleziazi bantu bane. 2 Tendazi na mutima wabota ku Yerusalema, nu sambalazi kwage buno bita byage byasila, buno bwagi bwage bwasigililwa, buno akasilwe na kuboko kwa Yehowa mambizi mabili ku bwagi bwage bunsania.” 3 Iyuki lya muntu likulaluka mu kalula bunee: “Longekazi nzila za Yehowa; Isiazi matingilo ma Kalaga weitu mu kalula! 4 Mpinga nu mpinga zizazibwe, nu mwiduko na mwiduko wasigulizibwe, nu gatimba geisibwe, nu nzila zili tutulu tutulu zisananibwe. 5 Nu lutanuno lwa Yehowa lwalolesibwe; bansania beli na mibili balumoneko gamozi, kubuno kanua ka Yehowa u katendile.”
6 Iyuki lyatendile, “Laluka!” Nu nabuzizie bunee: “Nilalukile kikizi?”
Tenda bunee: “Bansania beli na mubili beli anga bisugu, nu busoga bwabo bunsania buli anga maluba mu isoa. 7 Bisugu byoma, nu maluba makoloka, kubuno muuza wa Yehowa wopila kubyo. Lebelebe bantu babano beli anga bisugu. 8 Bisugu byoma, nu maluba makoloka; tondo idagi lya Kalaga weitu likemana milyalya.”
9 Ee Sayuni ukusambalaga musagu musoga, bakama gantata ga mwiduko mulazi; ee Yerusalema ukusambalaga musagu musoga, laluka n'iyuki bubibu; laluka, ntukue boba; usambalile miino za Yuda, lolazi Kalaga weinyu. 10 Lolazi Yehowa, Mwiya Bwangato Bunsania, akuvwa na bwangato, nu akwangata na kuboko kwage; lolazi nkalilo zage zili gamozi nage, nu mutali wa mulimo wage guli lwabusio lwage. 11 Akulisia kibombo kyage anga mulangi; akukundamania byana bya mikoko na maboko mage, nu kubyeka gantata ga bukuba bwage; nu babo bakumomia akabasondelezia bukebuke.
12 Nazi walindikile mazi mu ikasa lyage, nu kulindika igulu n'ikasa, nu kulindika mukungu wa kisi mu kilindiko, nu kulindika buzitu bwa miduko nu twiduko? 13 Nazi wamenyininne makengelo ma Yehowa, nu kumwigisia anga musunguzi wage? 14 Yehowa akalile lwango na nazi, nu nazi wamukasile menge nu kumwigisia nzila za bwisanana nu kumwigisia nzila za bumenyinino aba kumulolesia nzila za kusongolola? 15 Lolazi, bilongo binsania bili anga imata lya mazi mu idega inene; bili anga mukungu mukeke mu kilindiko; lolazi, bisanga bili anga mukungu mukeke ukulenga na lumpumpu. 16 Lubanda lwa Lebanoni talwakuka ku misali za keiya nu nyama zage tazakuka ku bisansa bya kugisibwa ku Kalaga weitu. 17 BaBilongo bansania beli buliabulia lwabusio lwage; bakuganzwa nage bakeke, nu tabeli kampa.
18 Kasi mwalingimanie Kalaga na nazi? nu mwamususanie na lukita lukizi? 19 Mukulumizi umozi akunyengula nkisi nu mutumbi ntakuvwama akuzikukila na olo, nu akuzitula myambalo za feza. 20 Wozo uli muzambi nunsania buno ntavwama kukasana nkaso zeno zikukasanwa, akusombola kyindi kya muti utanabola nu kukasa ku mutumbi kumubazila nkisi zitanatengatenga.
21 Ndi tamwamenyine? Ndi tamungule? Ndi tamwasambalidwe kutukila kulinga? ndi tamwasongolede kutukila kubumbwa kwa kisi? 22 Kalaga ukwikalaga gantata ga ndenge insania za kisi, nu babo bakwikalaga mu kyo beli anga mande, nu kwanza igulu anga nsulu nu kulyanza anga numba za nsulu za kwikala munda mwazo; 23 We ukumona bakota buno tabeli kena, ukumona ngatu za kisi kutaba na mutali. 24 Aba nu tabakokomezibwa, aba nu tabayikwa anga mbuto, aba nu tabeikala bindi byingi mu mwino anga bukwasa muti mizi munsi, nti akwiza kubo, nu bakame, nu lumpumpu lukutimba lwababalanganie anga mintula.
25 Wasililila abuzia bunee: “Mukandingimania na nazi, nibe anga we?”
26 Galaminazi mu mpena nu mulole! Nazi mubumbi wa bibino binsania? Wozo ukubika binsania mu biziki byabyo nu kubiganza akwinika binsania meina; ku kabamba ka magala mage mu bwangato bwage takuli kyampa kiteli ko.
27 Ee Yakobo, ku kabamba kakizi ukubuzia, nu uwe Israeli, kubuni ukutenda bunee: “Nzila zane zabiswa ku Yehowa, nu bitondo byeitu byasigilidwe ku Kalaga wane?” 28 Ndi ntukumenya; ntungule buno Yehowa eli Kalaga wa milyalya, nu Mubumbi wa kisi kinsania ntakutamba, aba ntakukutwa? Menge mage tamakulondwa. 29 Akukasa magala ku babo bakutwa, nu akutalikila magala ku babo batamba. 30 Aba basikila bakutwe nu kutamba, nu mitoka zikuke nu kugwa; 31 tondo babo bakulemanina Yehowa babe na magala mato, balenge mu mpelela anga ndiu, nu beitume lubilo nu tabakutwe, nu bende na magulu aba tababe na mpumu.