Migenzi kutuka baBeli babasila Hezekia.
39
1 Mu nkungu zezo Merodaki-Baladani, mwana wa Baladani, mukota wa Babeli asingile mukanda nu lukaso kuli Hezekia, kubuno ungule buno abezagile musambi nu onine. 2 Nu Hezekia ababogedebogede nu abalolesizie numba za bikagi bya bukunza bubibu, u feza nu olo nu bulago nu mwambo wa bukunza bubibu, nu numba insania zili na binsania byage bya bita nu bikagi binsania byamonekileko mu isuku lyage; takwabezaga kyampa mu numba zage, aba mu bukota bwage kyatabalolesizie. 3 Isaya mulengania avule ku mukota Hezekia, nu amubwide bunee: “Bantu babano batendile buni? Nubo batukile kuni kubasa kuguli?”
Hezekia atendile bunee: “Batukile mu kisi kya bulazi kubasa kundi, kutuka ku Babeli.”
4 Abuzizie bunee: “Bamonine ku kikizi mu numba zobe?”
Hezekia amwakwide bunee: “Bamonine ku bikagi binsania bya mu numba zane; nu takuli kyampa kya bikulo byane kinsyabalolesizie.”
5 Kazanga kongo Isaya abwide Hezekia bunee: “Ungwilila iyuki lya Yehowa, Mwiya Mayombo: 6 Lola, nkungu zikuvwa buno mu zezo nkungu binsania bili mu numba zobe, nubyo byabikaga baso aaba nu lelo, byekwe ku Babeli. Takuli kikagi kyampa kyasigale, u bwatenda Yehowa. 7 Nu bamozi munkatini mwa bana bobe mu kikanga kyobe, u kibuti kyobe bekwe ku bukobe bulazi, nubo bakaba bakambi mu numba za mukota wa Babeli.”
8 Hezekia abwide Isaya bunee: “Kitondo kya Yehowa kiwatendile kili kisoga.” Kubuno akengede, ububo bubobelelo nu bulili bikaba mu bindi byane.