Lusambo nu kona kwa Hezekia.
38
1 Mu bindi bibyo Hezekia abezaga musambi bwigi na kukua. Nu mulengania Isaya, mwana wa Amozi, avule kweli, nu amutendile bunee: “Yehowa atenda bunee: ‘Longeka bitondo bya numba zobe, kubuno wakue nu ntwalame.’” 2 Nu Hezekia alolede ku kitutu, nu asegile ku Yehowa. 3 Atendile bunee: “Ee Yehowa, kengela, nkukusega na kyombo, buno ukengele bunatabangile lwabusio lwobe mu bulili nu na mutima wa komanizia, nu nakitile busoga ku meiso mobe.” Nu Hezekia alilile nunse.
4 Iyuki lya Yehowa lyavule ku Isaya nu lyatendile bunee: 5 “Enda, ubule Hezekia buno bubuno u bukubula Yehowa, Kalaga wa so Davidi, atenda buno, nungwa masego mobe, nu namonine ku bisozi byobe; natalikile ku bindi byobe myaka ikumi nu itano. 6 Nu nne nakonie, nu mwino wono, ku maboko ma mukota wa Asuria nu nalange mwino wono.
7 Kikino kyabe kalolesio kuguli kutuka ku Yehowa, buno Yehowa azindilizie kitondo kikino kyatendile: 8 lola, nasubye kilimelime kya kakengelezio ka nkungu kise kyagela ku bilindiko bya Ahazi buno kisubye bilindiko ikumi kumbusa.” Ububo musi wasubizie bilindiko ikumi byabezaga byatinga ku kilindiko.
9 Lwimbo lwasanzile Hezekia, mwangati wa baYuda, kumbusa kwa kona lusambo lwage: 10 Natendile bunee, “Munkatini mwa bindi byane natunganana kwenda ku bakuzi; natikizibwe kyindi kya myaka zane.” 11 Natendile bunee: ‘‘Nsyamone lingo ku Kalaga Yehowa, mu kisi kya balami; nsyamone lingo ku muntu aba kulama na bantu mu kisi kikino. 12 Bindi byane byatikizibwe kundi, anga bukugondwa numba za hema za mulangi; nagondile kalamo kane anga muluki wa nsulu, antikizye ku kilukilo; kutukila ku musi aaba mu kindi wanzindilizie. 13 Nikede kibibi aaba nu nindunindu, anga kimbwe kyatandile makwa mane mansania, kutukila musi nu kindi wanzindilizie. 14 Nalilile anga bukutenda kantamba aba nkokonyangi; natongile anga nkulimba; meiso matambile kugalamina kwigulu; ee Yehowa, nili mu kabebe; nkasie.
15 Natende buni? We u wabutendile kundi nu We u wabukitile, nende bukebuke myaka zane insania ku kabamba ka kabebe ka mutima wane. 16 Ee Yehowa, ku bitondo bibino bantu bakulama nu mu bitondo bibino binsania u muli kalamo ka mutima wane, bubo wanonezie nu kundamia. 17 Lebelebe ku kabamba kane ninine mutima tondo uwe ku lutundo wonezie mutima wane kutuka ku muzinga wa lukuo, kubuno walekede bwagi bwane kumbusa kwa mugongo wobe. 18 Kubuno kiziki kya bakuzi takinakuganuna aba lukuo talunakutanuna, babo bakuzi tabeli na kilemanizio kya bulili bwobe. 19 Wozo uli na kalamo u mulami akuganuna anga nne lelo; isi wa bana abalolesie bulili bwobe. 20 Yehowa eli kayikayika kunonia, ububo twimbe nimbo zane na nzenze, bindi binse bya tulamo tweitu mu numba za Yehowa.”
21 Isaya atendile bunee: “Batole byasola byakitwa na biguma bya tini, nu bamulande byo ga kibimba buno one.”
22 Nu Hezekia atendile bunee: “Kakengelezio kakizi kakundolesia buno nabakame mu numba za Yehowa?”