Bulengania bwa konibwa kwa Yerusalema.
37
1 Nu mu nkungu zungule Hezekia, atile nsulu zage nu eikukide na nsulu z'ikunino, nu eingide mu numba za Yehowa. 2 Nu asingile Eliakimu mwemanizi wa numba za mwangati, nu Sebuna musanzi, nu bakulu ba basankoga, beikukide nsulu z'ikunino, bende ku Isaya mulengania, mwana wa Amozi. 3 Bamubwide buno mwangati Hezekia atenda bunee: “Busi bubuno buli bwa kabebe, nu bwa nsoni nu bwa kunyegwa, kubuno bana bese bwigi na kubutwa, tondo takuli magala ma kubabuta. 4 Embe Yehowa, Kalaga wobe, ungule ku bitondo bya Rabashake, wasingilwe na wozo mukota wage wa Asuria, buno alinge Kalaga Mulami, nu anazugila bitondo byungule Yehowa, Kalaga wobe. Umpanga segela kibombo kyasigala na komanizia.” 5 Ububo bakambi ba mwangati Hezekia bavule kuli Isaya. 6 Nu Isaya ababwide bunee: “Bubuno u bumwasambalile mwangati weinyu, u bwatenda Yehowa, bunee: ‘Ntukue boba ku bitondo bimungule kubyo, bitondo byambengile bakambi ba mukota. 7 Nabike muuza munda mwage, buno ongwe ku musagu nu manungunungu, asubye mu kisi kyage, nu nne namwite na mwene wa nganda mu kisi kyage.’”
8 Bubo Rabashake asubizie, nu asangile mukota wa Asuria akwitana na Libuna kubuno ungule buno mukota wage atuka ku Lakisi. 9 Nu gongule Saniharibu musagu wa Tiraka, muEtiopia, mukota wa Misri, kutenda buno akubasa kukita bita nage, nu gongule ku bitondo bibino, asingile migenzi ku Hezekia kutenda bunee: 10 “Tendazi ku Hezekia, mwangati wa baYuda, bitondo bibino; mubulazi bunee: ‘Ntusige Kalaga wobe u wakatizizie kukwengelela, mu kutenda buno Yerusalema ntabikwe mu maboko ma mukota wa Asuria. 11 Lebelebe wungule misagu za bitondo binsania byakitile bakota ba Asuria ku bino bisi binsania kubizikya nunsania; nu uwe ndi wonibwe? 12 Ndi nkisi za bilongo zonezie babo bazikizibwe na batatane? nkisi za Gozani nu Harani nu Rezefu nu ba ku Edeni babezaga ku Telasari? 13 Kuni kuli mukota wa Hamati nu mukota wa Arpadi, nu mukota wa mwino wa Sefarwaimu, nu wozo wa Hena, nu wozo wa Iwa?’”
14 Nu Hezekia akatile mukanda ku maboko ma zezo migenzi, nu agusomine. Bubo Hezekia abakamine nu kwingila mu Numba Zasililila za Yehowa, nu awanzile lwabusio lwa Yehowa. 15 Hezekia asegile Yehowa, nu atendile bunee: 16 “Ee Yehowa, Mwiya Mayombo, Kalaga wa baIsraeli, ukwikalaga munkatini mwa makerubi, uwe uli Kalaga, uwenyene munkatini mwa makota mansania ma kisi, uwenyene u wabumbile igulu nu kisi. 17 Ee Yehowa, tega matuzi mobe; ee Yehowa, ungwilila; limbula meiso mobe, ee Yehowa, lola, nu ungwilila bitondo binsania byasingile Saniharibu kulinga Kalaga mulami.
18 Ee Yehowa, lebelebe bangati ba Asuria bazikizye bilongo binsania nu bisi byabo. 19 Beisile tulaga twabo ga keiya, kubuno tatwabezaga tulaga, tondo twabezaga milimo za maboko ma bantu, u tulaga twa miti nu makozi; ububo batuzikizye. 20 Umpanga kano kaluma, Yehowa, Kalaga weitu, tonie ku kuboko kwage, buno makota mansania ma kisi mamenye buno, ee Yehowa, uwenyene uli Kalaga.”
21 Nu Isaya, mwana wa Amozi, asingile ku Hezekia kumutenda bunee: “Ubukubula Yehowa, Kalaga wa Israeli: Kubuno mwasegile kundi ku kabamba ka Saniharibu, mukota wa baAsuria, 22 kikino u kitondo kyatendile Yehowa kweli: Kikumi, u mukinga wa Sayuni, akukubenga nu kukwililika nunsania; kikumi kya Yerusalema atengia itoe lyage kumbusa kwobe gawatina. 23 Waswilide nu kulinga nazi? nu walalukile n'iyuki ku nazi? Wagalaminne na kabenga ku Wozo Wasililila wa Israeli! 24 Walingile Yehowa ku tunua twa bakambi bobe nu watendile bunee: ‘Ku bwingi bwa tuyanga twane, nabakame gantata ga nkangamo za miduko, ku biziki by'idungu lya Lebanoni; nu nne nasinde miti zage milazi, nu misunobari ukumanwa muti wa shindano wa kusombola, nu nabakame ku kiziki kyage kya kuzinda, aba ku kiziki kya kibalagogo, isoa lya miti likukolamaga nunse. 25 Nombile tunuabalongo, nu kunua mazi, nu ku tusindilo twa magulu mane nakamizie nuuzi insania za Misri.’
26 Ndi ntungule buno nne Yehowa u wabulongekile wakalazi? nu nne nabusombwede kutukila wakalazi? Kano kaluma nakizindilizia, aba uwe wabigie mwino guli na mukolo kuba bukindu. 27 Nu beiya mwino tababezaga na magala, nu bazangilezangile, nu babede na nsoni, babezaga anga bisugu by'isoa, nu anga kitembele kibisi, anga bisugu gantata numba, nu anga bikwasa byoma lwabusio tabisanuna.
28 Tondo nizi kiziki kobe kya kwikala, nu kutuka kobe, nu kwingila kobe, nu bongoa bobe kundi. 29 Ku kabamba ka bongoa bwobe kundi, nu lwikotio lwobe, u binungule kubyo na matuzi mane, nkakubanga ndobani mu mwembe wobe, nu kyuma kya kusondelezia mpunda mu kanua kobe, nu nne nakusubye mu nzila ziwavule muzo.
30 Ee Hezekia, kakano kabe kalolesio kuguli, buno wono mwaka walie byasile byo binyene, nu mwaka w'ibili walie matubulo mabyo nu mwaka w'isatu yikazi mbuto, nu mwatubule, nu muyike masoa ma mizabibu, nu mulie biguma byazo. 31 Nu kibombo kyasigede kya numba za Yuda kyabike mizi munsi, nu kukolama biguma kwigulu. 32 Kubuno ku Yerusalema kwatuke kibombo kya basigala, nu kutuka ku mwiduko wa Sayuni kingo kibombo kya basigala; iyilili lya Yehowa, Mwiya Mayombo lyakite bitondo bibino.
33 Ububo Yehowa atenda bubuno ku kitondo kya mukota wa Asuria, nu we nteingile mu mwino wono, aba nteise musungu mugo, aba ntavwe lwabusio lwago na ngabo, aba ntasakike kiziki kya kusuluka mukolo. 34 Mu nzila zezo zaavwaga muzo, mu zezo nzila, u mwasubye lingo, aba nteingile munda mwa mwino wono, u bwatenda Yehowa. 35 Nu nne nalange mwino wono, nu kuwonia ku kabamba kane nnenyene, nu ku kabamba ka Davidi, mukiti wane.”
36 Nu mu nkungu zezo mwanzelo wa Yehowa abasile ku ido lya baAsuria, nu kwita bantu tununu lukama makumi kinana nu tutano (185.000); nkungu zayukile bantu mu nindunindu basangile bansania bitumba. 37 Ububo Saniharibu, mukota wa baAsuria, atukile nu asubizie ku Ninawe nu eikede kuko. 38 Nu nkungu zabezaga akukumbamina mu numba za Nisiroki kalaga kage, Adarameleki nu Sarezeri u bana bage bamwitile na mwene wa nganda; batinine ku kisi kya Ararati; nu Esali-Hadoni, mwana wage, angatile ga kiziki kyage.