Mukota wa baAsuria abaside baYuda.
36
1 Mu mwaka w'ikumi nu inazi wa bukota bwa Hezekia, Saniharibu mukota wa baAsuria abakamine ku miino insania za Yuda zabezaga na mikolo nu azikatile. 2 Nu mukota wa baAsuria asingile Rabashake a kutuka ku Lakisi kwenda ku Yerusalema, kuli mwangati Hezekia, gamozi n'iyombo inene lya bita; we emenne bwigi na kagezi ka mazi ma kunua ga kanuabalongo ka kuntata, keli mu nzila nnene za ku kiziki kya kwengia nsulu. 3 Eliakimu, mwana wa Hilkia, wabezaga mwemanizi wa numba za mukota, nu Sebuna, musanzi, nu Yoa, mwana wa Asafu, mulangi wa mikanda za wakalazi bamubaside. 4 Rabashake abatendile bunee: “Musambalile Hezekia buno, kano kaluma mukota munene, u mukota wa Asuria, atenda bunee: ‘Kilemanizio kikizi kyukulemanina? 5 Natenda buno, lwango lwobe nu magala mobe ku bita bili bitondo bya buliabulia. Umpanga, ukulemanina nazi, aaba nu ku widekanukizie na nne? 6 Lola, wegamina ku Misri, ukulemanina kasusu ka nsekenseke kakubenzeka; ndi muntu akwegamina kuko, nti kakalika nu kubusula ikasa lyage; u buli Farao, mukota wa Misri, ku bansania bakumukatizia.
7 Tondo ndi watenda kundi bunee: “Twakatizia Yehowa, Kalaga weitu,” ndi ta wozo mwiya biziki byasakama nu tuyulo tuwatikizye, nu kutenda ku Yuda nu Yerusalema bunee: “Mwakumbamine lwabusio lwa kayulo kakano?”’
8 Umpanga kano kaluma, nkukusega, ukase mukota wane wa Asuria mukatilo w'idumbilo, nu nakukase farasi tununu tubili, ndi unavwama kuligizia bantu gantata gazo nu kwenda nazo. 9 Buni bunapumbia aba mukeke ku bakota b'iyombo bakukambila mukota wane, nu buukulemanina Misri kukukasa tuyanga nu bakwendaga ga farasi? 10 Kano kaluma, ndi nabakamine kwitana na kino kisi nu kukibigia kuteli lwango lwa Yehowa? Yehowa u watenda bunee: ‘Bakama nu kwenda kwitana na kino kisi nu kukibigia.’”
11 Eliakimu nu Sebuna nu Yoa batendile ku Rabashake bunee: “Tukukusega ntutende n'iswe ku kiYuda ku matuzi ma bantu beli ga mukolo, tondo tenda n'iswe ku kiAramu, kubuno tukukisongolola.”
12 Tondo Rabashake abatendile bunee: “Ndi mukota wane ansingile nitende bitondo bibino kuli mukota weinyu nu kumuli tugu? Nu ndi ntansingile ku bantu babano beli gantata ga mukolo, u babo gamozi n'inyu balie tubi twabo bobenyene, nu kunua masu mabo?”
13 Kumbusa Rabashake emanukile nu kulaluka n'iyuki inene mu kiYuda; atendile bunee: “Ungwililazi bitondo bya mukota munene, u mukota wa Asuria! 14 Mukota atendile bunee: ‘Mwangati Hezekia ntamwengelele inyuwe, kubuno ntavwame kumwonia; 15 aba tamusige Hezekia kumulemanizia inyuwe ku Yehowa, nu kutenda bunee: “Lebelebe Yehowa atonie; mwino wono tawakasanwe mu maboko ma mukota wa Asuria.”’
16 Tamungwilile ku Hezekia; kubuno mukota wa Asuria atenda bunee: ‘Kitazi malonga na nne, nu muvwe kundi, nawe alie muzabibu wage, nawe alie mutini, nawe anue mazi ma kanuabalongo kage wenyene; 17 aaba nu ganavwe, nu kumukumuna inyuwe ku kisi kili anga kisi kyeinyu, kisi kya ngano nu mazi ma biguma, kisi kya kampampa nu masoa ma mizabibu. 18 Hezekia ntamwengelele, na kutenda bunee: “Yehowa atonie.” Ndi kuli kalaga kamozi ka tulaga twa baBilongo konezie kisi kyage ku kuboko kwa mukota wa Asuria? 19 Kuni kuli tulaga twa Hamati nu Arpadi? Kuni kuli tulaga twa Sefarwaimu? ndi twonezie Samaria na kuboko kwane? 20 Nazi munkatini mwa tulaga tunse twa bisi bibino twonezie kisi kyabo ku kuboko kwane, buno Yehowa onie Yerusalema kutuka ku kuboko kwage?’”
21 Tondo bantu beikede kibibi, nubo tabamwakwide aba iyuki lyampa; kubuno lyabezaga ikakizio lya mwangati bunee: “Tamumwakule.” 22 Nu Eliakimu, mwana wa Hilkia, wabezaga mwemanizi wa numba za mwangati nu Sebuna musanzi nu Yoa mwana wa Asafu mulangi wa masanzo ma bitondo bya bukota bavule ku mwangati Hezekia na nsulu zabo zatilwe; bamubwide moki ma Rabashake.