Bukuluzi nu lutanuno lwa Israeli.
35
1 Kalula nu kisi kyakama byabogeboge; kalula kasekele nu kase maluba, anga muti wakwasia maluba ma mulibwa. 2 Wasie maluba mengi, kabe na mbogimbogi nu kwimba; kakaswe lutanuno lwa Lebanoni, nu busoga bwa Karmeli nu Saroni; bamone lutanuno lwa Yehowa, nu busoga bwa Kalaga weitu. 3 Mugugumike maboko ma batamba, nu kulindia mazu ma basosu. 4 Tendazi beli na mitima za boba bunee: “Mube na magala, tamukue boba; lolazi Kalaga weinyu avwe kumusuba, na kusuba kwa Kalaga avwe kumwonia.” 5 Ububo meiso ma byuku mazibulwe nu matuzi ma bimbula matuzi mazibulwe. 6 Ububo bitunga byatumetume anga nkenge, nu lulami lwa kaluma lukeimba; mu kalula mazi mabase, nu nuuzi mu kisi kyakama. 7 Nu misege zakama zikaba kiziba kya mazi, nu kisi kya mukamakama kikaba na tunuabalongo twa mazi; nu biziki bya mboa za mu lubanda gaziyombekaga gakasa bisugu gamozi na nsekenseke nu nsolu.
8 Kukaba nzila nnene kuko, zamanwe Nzila Zasililila. Bataswaga tabakatinga muzo, tondo zabe ku kabamba ka bango. Na watingage muzo aba eli kikongolo ntazimine muzo. 9 Kimbwe takyabe kuko, aba nyama nkali tazikegeta ko, nu tazikamoneka ko, tondo bakulwidwe batabange muzo. 10 Nu babo bakulwidwe na Yehowa bakasubya, nu bakabasa ku Sayuni na kwimba, nu mbogimbogi za milyalya zikaba gantata ga matoe mabo, bakaseka na mbogimbogi, nu kabebe nu kutonga byatine.