Lusungio lwa Yehowa ku baBilongo.
34
1 Inyuwe baBilongo, kundamanazi nu mungwilile; bantu, tegekelazi; bansania beli mu kisi, ungwililazi. 2 Kubuno bongoa bwa Yehowa buli ku baBilongo bansania, nu asomba bakoloboyo babo bansania; abeitile nunsania, abakasile bende kuseswa. 3 Bantu babo bakakua bakalekelwa ku mbuga, nu bitumba byabo bikuga, nu mikila zabo zagele mu miduko. 4 Kibombo kya nkeninkeni kya mwigulu kyanyenguke nu igulu lyagondwe anga lusamba, nu nkeninkeni zinsania zakoloke anga biguma bikukoloka ku miti. 5 Kubuno mwene wane wa nganda wanua nu wikuta mwigulu; lola, wagelele Edomu u bantu baswilidwe na lusungio. 6 Mwene wa nganda wa Yehowa wiyala mikila nu manona, u mikila za byana bya mikoko nu mpene, nu manona ma bilimba bya mikoko, kubuno Yehowa abe na kayulo kuko ku Bosira, nu kisansa kinene kuko ku Edomu. 7 Nu mbogo zagoe gamozi nabo, nu byana bya ngombe gamozi na balume ba ngombe. Nu nsi zabo ziyale na mikila, nu mukungu wiyale na manona. 8 Kubuno buli busi bwa kusuba bwa Yehowa; asungie bantu ba Edomu, nu kulanga ba ku Sayuni. 9 Nuuzi za Edomu zagaluke kuba nyenge za keiya, nu mukungu wage wagaluke kuba kibiliti, nu kisi kyage kyagaluke anga nyenge zabanga keiya.
10 Takakazima musi aba kindi; muuki wage ukabakama milyalya, ku kibuti na kibuti kyasigale bukindu; takukaba muntu ukatinga munkatini mwakyo ku milyalya nu milyalya. 11 Nyamunkoloba nu kiko bikale munda mwakyo, nu sulukutu nu kibombobombo bikale mukyo, nu Kalaga atintie muzigi wa kusungia, nu kilindiko kya bulingilingi kya bukindu. 12 Bakamana bakulu bavwe ku bukota, tondo takukaba aba umozi; bakota bakyo bansania bakaba buliabulia. 13 Mikele zikasa mu numba zakyo za bukota, nu lute nu nyitenge mu biziki byage byalanga bya mikolo; mugo mwabe kalimba ka mboa za mu lubanda nu lukalo lwa mbuni. 14 Nu zezo nyama nkali za mu kalula zakundamane gago na mboa za mu lubanda nu kumunwa, nu bilimba bya mu lubanda byamanane; nu kuko sulukutu atetele nu kumunwa. 15 Kuko sulukutu akite kizumba kyage, nu kutela mongu, eikalile nu kutotola bana kunsi kwa kilimelime kyage; kuko ndiu zakundamane nawe na munyage. a
16 Londazi mu kigondi kya mukanda wa Yehowa nu musome; takwabe umozi munkatini mwa bansania ukeida kubasa, takuli ukeida munyage, kubuno kanua kage ubwabulagile, nu Muuza wage ukabakundamania. 17 Nu We abalonganizizie biziki byazo, nu kuboko kwage kwababeganizie kisi na muzigi, kikaba kyabo milyalya, beikale mukyo kibuti na kibuti.