Yerusalema akululwa
33
1 Kabebe kuguli, uwe munyagi, nu uwe ntwanyagilwe, ukubigia nu ntwabigizibwe, nkungu ziukasiga kusungia ukasungibwa, nu nkungu ziwasile kwengelela, nubo bakwengelele. 2 Ee Yehowa, tukwile kyombo, tukukulemanina; ube mukasia weitu na nindunindu, nu lonio lweitu mu nkungu za tubebe. 3 Mu nkungu z'iyuki lyobe linene baBilongo batina, nu mu kwemanuka kobe bantu babalangana. 4 Bikagi bimwanyagile byasongibwe anga bukusongagibagwa mande, bantu balenge gantata gabyo anga bukulengaga nzige.
5 Yehowa atanunwe; kubuno eikile kwigulu: eizazia Sayuni kwisanana nu bulili. 6 Nkungu zobe zagugumana, iguma lya kukwonia u menge nu bubobelelo, nu kukua Yehowa boba kuli isuku lyobe.
7 Lolazi, mapuka mabo makulila ga mulungu, nu migenzi za bubobelelo zikulila na kangonongono. 8 Nzila nnene zabuba nu mutingi ntatinge lingo. Eitile idagano, abengile miino, nteizi muntu buno eli kena. 9 Kisi kili na kabebe nu kyatamba; Lebanoni eli na nsoni nu akama; Saroni eli anga kalula, Basani nu Karmeli takwabe bisugu lingo.
10 Nkuzanzuka kano kaluma, u bwabula Yehowa; kano kaluma nasasikwe; kano kaluma nakutibwe. 11 Inyuwe mweke meimi ma mpepa, nu mwabute bisugu byoma, muuza weinyu wamugisie anga keiya. 12 Nu baBilongo bakagisibwa anga mpemba, anga mikele zakokolwa nu kwiswa ga keiya.
13 Inyuwe beli bulazi, ungwililazi ku bitondo binakitile; nu inyuwe beli bwigi, mwitabizie bwangato bwane. 14 Bagi beli ku Sayuni bakua boba, kugilimina kwakata bagi. Nazi munkatini mweitu wikale mu keiya kakombola? Nazi ukeikala na keiya kakombola milyalya? 15 Wozo ukwenda mu kwisanana nu ukutendaga bulili; wozo ukusombaga mutali wa bukanga, nu watitula maboko mage ku bitondo bya bwiti, utongwilila nango za beiti, nu kuziba meiso buno ntalole ku mibi. 16 We eikale kwasakama; itinino lyage lyabe kuntata kwa makozi masakama, akaswe kampampa nu mazi mage tameide.
17 Meiso meinyu mamone mwangati mu busoga bwage nu malole kisi kili bulazi. 18 Mutima wobe wakengele bitondo bya boba bwa wakalazi: Eli kuni musanzi? Eli kuni wozo ukuligwa kodi? Eli kuni mwiya kulanga biziki bibibu? 19 Tamwamone lingo ku bantu bakali, bantu ba mitendezi mibibu zitakumenywa, aba beiya mitendezi za bageni zitakusongololwa.
20 Lola Sayuni, mwino w'ikundamano lyeitu, nu meiso mobe mamone ku Yerusalema, u kiziki kya bubobelelo, nu numba za hema ziteigibwa, nu mango mage tamakayulwa, aba mizigi zage tazikaseswa aba umozi. 21 Tondo kuko Yehowa abe lutanuno lweitu. Kuko kwabe nuuzi nnene nu nkeke; tamatinge muzo maato ma nkapi, aba maato manene tamatinge kuko. 22 Kubuno Yehowa eli ngatu zeitu; Yehowa eli mulongeki weitu wa milembe; Yehowa eli mwangati weitu; nu We akatukulula. 23 Mizigi zobe za bwato zatamba; ntwavwame kuzitintia mu iyango nunse, aba kukanda nsulu kulyo za kukata lumpumpu lukwenzia bwato kuzo; bikagi byingi bya bunyagi byabeganizibwe, aba bitunga byakate bikagi. 24 Aba takuli mwiya mwino ukatenda bunee: “Nkusamba”; beikile mugo bakasigililwa mibi zabo.