Bukota bwisanana.
32
1 Lolazi, mukota angate mu bulili, nu bangati bangate mu kwisanana. 2 Nawe nawe abe anga kiziki kya kwibisa na lumpumpu, nu kiziki kya kwibisa na kisoa, anga nuuzi mu kiziki kyakama, anga kilimelime kya lwanda lunene mu kisi kyida mazi. 3 Mu zezo nkungu meiso ma babo bakumona tamabe na kapilo, nu matuzi ma babo bakungwa mongwilile. 4 Mutima wa wozo muntu ukusasia kutenda wamenye menge nu kumenyinina, nu lulami lwa wozo ukutetuma lwatende bwasibwasi. 5 Kikongolo ntakutibwe lingo, nu muntu mubi ntamanwe buno eli musoga. 6 Kubuno kikongolo akutenda bya bukongolo nu mutima wage ukukengela bubi. Nu akukita bwengelezi, nu kutenda bitondo bibi ku Yehowa, nu kwima beli na nzala idia nu beli na mpusia mazi. 7 Misako za muntu mubi zili mibi; akukengela kubigia babota na moki ma buza, aba mu nkungu zikutenda muzambi bulili. 8 Nu muntu wa mponga akukengela bitondo bya kukasia, nu na misako misoga akwemana.
9 Inyuwe bakikulu batamba, yukazi, mungwilile iyuki lyane; inyuwe bakinga batamba, tegekelazi matuzi meinyu ku bitondo byane. 10 Kubuno mwabe na lusungio ku mwaka umozi nu bindi bikeke, inyuwe bakikulu bikongolo mwagilimine; ku kabamba ka buno matubulo ma mizabibu makege, nu nkungu za kutubula masoa tazavwe. 11 Inyuwe bakikulu batamba, giliminazi; inyuwe beteli na makengelo, mwangame, tikyazi nsulu zeinyu nunsania, mube mundulu nu muvwale nsulu z'ikunino mu bibunda byeinyu. 12 Mwidibule ku makuba, nu kulila ku kabamba ka masoa masoga ku kabamba ka mizabibu zakolamaga insania, 13 nu ku kabamba ka kisi kya bantu bane kubuno mikele nu mingilingili zase, ee, lilazi mu numba za mbogimbogi nu mu mwino wa mbogimbogi. 14 Kubuno numba za mukota zasigwe, nu mwino wa bantu beingi wasigala bukindu; mwiduko nu numba zasakama za byindo zabe lubuga lwa nyama ku milyalya, zabe kiziki kya meiya ma mpunda za mu lubanda nu kiziki kya kulia ku lusumba lwa mikoko, 15 aaba nu Muuza wakubuke kutuka mwigulu gantata geitu, nu kalula kabe isoa lyanaga nunsania, nu isoa lya kwasia lyaganzwe kuba lubanda. 16 Nu kwisanana kwabe mu kalula, nu bulili bwabe mu isoa lyanaga. 17 Mulimo wa bulili wabe bubobelelo, nu matubulo ma bulili mabe kumunwa nu kilemanizio kya milyalya.