Misri ntanavwama kukasia.
31
1 Kabebe ku babo bakugela ku Misri kulonda bukasia, bakwegamina ku farasi nu kulemanina bwingi bwa tuyanga twabo nu magala ma farasi zabo; tondo tabakulemanina Wasililila wa Israeli, aba kulonda kukasibwa na Yehowa! 2 Tondo Yehowa eli na menge, akuvwama kulusia nsungio, nu ntakugalukya bwatendile; nu We akasungia numba za bakukita bubi, nu akusomba babo bakukasia bagi. 3 Tondo baMisri beli bantu, ta beli Kalaga; farasi zabo zili nyama, tazili muuza. Nkungu zalambye Yehowa kuboko kwage, mukasia eikuke nu kugoa, nu mukasibwa agoe, nu bansania bazike gamozi. 4 Bubuno u bwantendile Yehowa bunee: “Kimbwe nu kyana kya kimbwe bikuzuga gantata ga byitile, nu mu nkungu za mubila munene wa balangi wamanwa, nti ntakukua moki mabo boba, aba nteli na boba ku kabamba ka kazege kabo. Ububo Yehowa, Mwiya Mayombo, agele kukita bita gantata ga mwiduko wa Sayuni nu gantata ga mwiduko wage. 5 Anga bukupupililaga tuzoni byana byabo, ububo Yehowa, Mwiya Mayombo, alange Yerusalema; agulange nu agonie, nu kutinga gantata gago agukulule.”
6 Inyuwe baIsraeli, subyazi ku Yehowa, wozo u mwagunine nunsania. 7 Mu busi bubo, muntu na muntu akateza nkisi zage za feza nu nkisi zage za olo, zimwikitide na maboko meinyu mubenyene, zabede bwagi kumuli.
8 Asuria akakindwa na mwene wa nganda, ta wa muntu; mwene wa nganda uteli wa muntu ukabeita; nu bakatina mwene wa nganda, nu basikila babo bakabikwa ku bukobe, 9 nu kiziki kyage kyalanga ky'itinino takyabe lingo ku kabamba ka boba, nu bakota bage bakue kamenyikilo boba; u bukubula Yehowa uli na keiya kage ku Sayuni nu muzonga wage mu Yerusalema.