MUKANDA WA ISAYA
1
1 Kalolesio kamonine Isaya, mwana wa Amozi. Akamonine ku kabamba ka baYuda nu ku kabamba ka babo ba ku Yerusalema, mu bindi bya Uzia nu Yotamu nu Ahazi nu Hezekia, bakota ba baYuda. 2 Meigulu, ungwililazi; nu kisi, ungwililazi, kubuno Yehowa abwide bunee: “Nalisizie bana nu kubakuzia, tondo bangunine. 3 Ngombe zizi nyene zo, nu mpunda zizi kiziki kya kulisibwa kya nyene zo. Tondo baIsraeli tabeizi, bantu bane tabakumenyinina.” 4 Aa, kilongo kya bwagi, bantu beiya mizigo za bwagi, kibuti kya bakukitaga bubi, bana bakubigia; basigile Yehowa, nu babengile Wozo Wasililila wa Israeli, basubizie lumbusambusa.
5 Kubuni mwasusulwa lingo? Kubuni mwitila kuguna? Itoe linsania lyasamba, nu mutima unsania watamba. 6 Kutukila isindi aaba nu ku itoe takuli busoga mugo, tondo byulu nu bituto nu byulu byabola. Tabyasugulwa, tabyakandwa, tabyabongibwa na mwambo. 7 Kisi kyeinyu kyabigibwa, miino zeinyu zagide na keiya. Bageni bakulia matubulo ma kisi kyeinyu, lwabusio lweinyu, nu bageni bakukibigia. 8 Mukinga wa Sayuni asigwa anga lusu mu isoa lya mizabibu, anga kigenge kili mu isoa lya masola, anga mwino watimbwa na beiti. 9 Songo Yehowa, Mwiya Mayombo ntatusigide bantu bakeke, songo twabede anga baSodoma, tunasusanize na baGomora.
10 Inyuwe bangati ba ku Sodoma, ungwililazi iyuki lya Yehowa; nu inyuwe bantu ba ku Gomora, tegazi matuzi ku mulembe wa Kalaga weitu. 11 Yehowa akumubuzia bunee: “Bwingi bwa bisansa byeinu buli kikizi kundi? Niyala na nkaso za kugisibwa za bilimba bya mikoko, nu na manona ma nyama zanona; nsikubogaboga na mikila za balume ba ngombe, aba za byana bya mikoko aba za bilimba bya mpene. 12 Nkungu zimukuvwa kumoneka lwabusio lwane, nazi wamukakizizie kukita kikino, kutabanga mu milungu zane? 13 Tamuvwe lingo na bisansa bya bulia, aliga zili lusombo kundi, mbalo za mwezi nu bindi bya Sabato, nu kumana misanganano, nsikubitabizia, nu kumana misanganano kuli kubi. 14 Mutima wane ukusomba myezi mito zeinyu nu bisagulo byeinu byasombolwa, bili muzigo kundi nu nakutwa nabyo. 15 Mu nkungu zimukulambya maboko nabise meiso mane, aba nu nkungu zimukusega nsyungwilile. Maboko meinyu meiyala na mikila. 16 Mwiyogie, mwiswagie nunse; tikyazi bubi bwa makitilo meinyu ku meiso mane. Menkazi bwagi bweinyu. 17 Iyigisiazi kukita busoga, londazi nsungio zisanana, kasiazi babo bababazibwa, songololazi nkubi, segelazi musigala.”
18 Yehowa akubula bunee: “Vwazi, tukalazi lwango gamozi, ndi mibi zeinyu zili zakisimana, nti zikaba zenga anga lubula, aba zili zakisimana zikeingibwa anga myoza za mikoko zenga. 19 Ndi munanitabizia nu kunnungwa, nti mwamone mponga za mu kisi. 20 Tondo ndi mwaguna nu kwaga, nti mwaseswe na mwene wa nganda, kubuno kanua ka Yehowa kabutendile.”
21 Lukita lukizi mwino wakatizibwa wagalukile kuba kitazi; beisanana nu beiya bulili babezaga mugo, tondo kano kaluma beiti tugu. 22 Feza zobe zabede mbi, nu maku mobe masambikilwe na mazi. 23 Bangati bobe beli baguni, beli bilemba bya beibi. Bansania batunda nkaso, nu bakuyanga nkalilo. Tabakusesa milondo za nkubi, nu milondo za misigala tazikubasa lwabusio lwabo.
24 Ububo Mukota, Yehowa, Mwiya Mayombo, Mwiya Magala wa Israeli akubula bunee: “Ee, nsikasunua na beiti bane, nu nkeisuba ku beiti bane. 25 Nkagalukya kuboko kwane kuguli, nu nkatikya nunse bubi bweinyu nu kutikya bibyo bibi byobe binsania. 26 Nkasubya ngatu zeinyu anga wakalazi, nu beiya nango beinyu anga bwabezaga mu kulinga. Kumbusa ukamanwa bunee: ‘Mwino wa beisanana, Mwino wa bakatizia.’”
27 Sayuni ukakululwa na nsungio zisanana, nu bantu bago bakagalukibwa na bwisanana. 28 Tondo baguni nu bagi babigibwe gamozi, nu babo bakusiga Yehowa bazikibwe.
29 Kubuno mukakua na nsoni ku kabamba ka miti zezo za mwalo zimwatundile, mukakua na nsoni ku kabamba ka masoa mamo mamwasombwede. 30 Mwabe anga muti ukumanwa mwalo nu nsamba zago zoma, anga isoa liteli na mazi. 31 Nu beiya magala babe anga mbobela, nu mulimo wabo anga lusase lutakuzima, nu bagie gamozi na milimo zabo, nu takuli umozi unavwama kuzimia keiya kako.