Kusambala kwa wamulume nu mukikulu.
8
1 Songo uli mubitu wane, wamomine ku mabele ma mmane! Songo ninakusangile kumbuga, songo ninakumumine ku matama! Ububo takuli muntu unambengile. 2 Ninakusondelezizie mu numba za mmane wanigisizie. Ninakunusizie maku ma nsunu, ma mazi ma makomamanga mane. 3 Kuboko kwage kwa seikazi kuli kunsi kw'itoe lyane, nu kuboko kwage kwa seidume kwankumbatila. 4 Ee, bakinga ba ku Yerusalema, nkumusengezia buno tamuyukye, aba kuzanzula lutundo, aaba nu nkungu zalo. Lubuzio lwa bakikulu ba ku Yerusalema.
5 Nazi wozo mukinga watuka mu kalula, wegamina ku mutundwa wage?
Kutenda kwa mutundwa.
Gansina muti wa mapela nakuyukizie. Gago gekile nyoko iyimi, gago gabede nyoko na lubaba lwa kukubuta. 6 Mbike anga kalolesio ku mutima wobe, anga kalolesio ku kuboko kwobe, kubuno lutundo luli na magala anga lukuo, nu lugi lwalo luli na magala anga nsinda. Lukubanga anga ngulumina za keiya ka Mukota Kalaga. 7 Mazi mengi tamanavwama kuzimia lutundo, aba mwiyalo tagunalukokya; ndi muntu anakasenne binsania bya numba zage ku lutundo, nti anabengilwe nunsania.
Babitu ba mukinga batenda.
8 Tuli na mubitu weitu mukeke, nu we ntasa mabele. Buni butwakitile mubitu weitu mukeke ku busi bwasegwe? 9 Ndi eli kitutu, nti tobake gantata gage numba zasakama za feza. Ndi eli lwibi, nti tunamukukila na mbavu za mierezi.
10 Nili kitutu, nu mabele mane meli anga numba zasakama. Ububo nabede ku meiso mage anga wamutananizia. 11 Solomono abezaga n'isoa lya mizabibu ku Bali-Hermoni, abikile balangi mu isoa lya mizabibu; nawe nawe na watunganenne kuliga byindi kanunu bya feza ku biguma byage. 12 Tondo isoa lyane lya mizabibu lili lyane, lili lyane lya kulanga. Ee, Solomono, uwe wabe na kanunu, nu nkama ibili zili za babo bakulanga biguma.
Mutundwa atenda lingo.