MUSAMBAZI
1
1 Moki ma musambazi, u mwana wa Davidi, mukota mu Yerusalema. 2 Musambazi akutenda bunee: “Binsania bili bulia, ee, buliabulia nunse. Binsania bili bulia.”
3 Muntu akumona mutali mukizi ku milimo zage insania zaakukita kunsi kwa kata k'igulu? 4 Kibuti kimozi kyasila nu kingo nti kyavwa, tondo kisi kili kankanka. 5 Kisongo kya busi kikusanuka nu kikugoba, nu kikusasia kusubya ku kiziki kukyatukile. 6 Lumpumpu lukutimba ku lulenge lwa kwidume nu ku lwa kwikazi; lumpumpu lukutimbatimba mu nzila zalo nu kusubya lingo. 7 Nuuzi insania zikugela ku kitatenge, tondo kitatenge takikwiyala. Ku kiziki kizikugela u kuko kuzikusubya lingo. 8 Binsania bikukutia muntu, nu muntu ntaneisula kubuni liso talikukutwa na kulola, nu kutuzi takukutwa na kungwilila.
9 Kikyo kyabezaga kikaba lingo. Takuli kena kato kunsi kwa kata k'igulu. 10 Ndi kuli kimozi kikutenda bantu bunee: “Lola kikyo kili kito?” Kyabezaga mu nkiko za lwabusio lweitu. 11 Takuli ikengelezio lya babo ba wakalazi, nu babo bakavwa tabakengelwe lingo na babo bakavwa kumbusa kwabo.
Menge meli bulia.
12 Nne, musambazi, nabezaga mukota wa baIsraeli mu Yerusalema. 13 Nabikile mutima wane kulonda nu kumenyinina na menge binsania byakitilwe kunsi kwa meigulu. Kalaga abikile muzigo munene ku bantu. 14 Namonine ku milimo insania zakitilwe kunsi kwa kata k'igulu, nu insania zili bulia anga kugeleka kukata lumpumpu. 15 Kikyo kyakumbama takineisananibwa lingo, nu kikyo kyida takinaganzwa.
16 Natendile mu mutima wane bunee: “Nili na menge mengi kutinga bansania bangatile mu Yerusalema lwabusio lwane. Nili na bumenyinino nu menge.” 17 Nalondile kutalikila menge nu busile nu bukongolo, nu namonine buno bitondo binsania bikukutia mutima. 18 Kubuno mu menge mengi muli tubebe twingi, nu kutalikila menge kukutalikila mbabazio ningi.