Bitondo bya Lemueli.
31
1 Bitondo bya mukota Lemueli, u bulengania bubo bwamwigisizie nina: 2 Mwana wane, buni? Mwana wa nda zane, nu mwana wa kilumbilo kyane, buni lingo? 3 Ntukasane magala mobe mansania ku bakikulu, nu kalamo kobe kubeli babo bakubigia bakota.
4 Tabwatunganana ku bakota, ee Lemueli, tabwatunganana ku bakota kunua maku, aba nu ku bangati kubuzia bunee: “Kuni kuli maku makali?” 5 Tabalebwe buno banavwa kwibilila makakizio nu kugalukya mulembe ku babo bakusungibwa. 6 Kasa babo bese bwigi na kukua maku, nu babo beli na tubebe ituba, 7 buno banue nu nti beibilila buzambi bwabo, nu nti tabakengele lingo kabebe kabo.
8 Tendela tuluma, ku kabamba ka bansania beli nkubi. 9 Tenda na kanua kobe, nu sungia na kwisanana, nu tendela bazambi nu bakwiyanina byabo.
10 Nazi unamona mukikulu musoga, kubuno bukunza bwage bwatinga nunse bukunza bwa makozi ma akiki. 11 Mutima w'iba wage ukumukatizia, nu nti ntaneida mutali. 12 Wozo mukikulu nti akumukitila busoga aba ta bubi, bindi binsania bya kalamo kage.
13 Nu akulonda myoza za mikoko nu kitani, nu akutunda kukita mulimo wage na maboko mage. 14 Nu we nti eli anga bwato bwa mukunzia wa bintu, akwenda bulazi kutola idia lyage. 15 Nu akusasagia kuyuka aaba busi tabukia busoga, nu akulisia kikanga kyage idia nu kyindi kyalyo ku bakiti bage. 16 Kungwa akengela isoa nti alikunza, nu na nkalilo zage akuyika isoa lya biguma.
17 Nti eitendeka ga kibunda kyage bubibu, nu akugugumika maboko mage; 18 akumona buno bya kukunza byage byili na mutali, nu kasuku kage takazime mu kindi. 19 Nu nti akota na maboko mage, nu na maboko mage akota lingo musinge.
20 Akulambya maboko mage ku bazambi, akulambya maboko ku babo bakwiyanina.
21 Ntakukuaga mpego boba ku kabamba ka kikanga kyage, nu kikanga kyage kinsania kyavwala nsulu zakisimana. 22 Nu akwikitila mugu, nu nsulu zage zili za kitani kisoga nu z'idangi lya misambo za mpene.
23 Iba wage eizibilwe mu mwino unsania, kungwa eikala gamozi na bakulu ba mwino.
24 Akukita nsulu nu kuzikunzia, nu kukasa mikoma ku bakunzia. 25 Eli na magala nu lwanzo ku meiso ma bantu, nu abogeboge ku bindi byavwe. 26 Akutenda na menge, Nu mulembe wa kyombo guli ku lulami lwage. 27 Akulangaga bitondo bya kikanga kyage busoga, nu ntakulia idia ly'idungia.
28 Bana bage bakwemana nu kumumana buno akaswa mponga, nu iba wage nu we akumuganunaga bunee: 29 “Bakikulu beingi bakukitaga busoga nunse, tondo uwe watinga babo bansania.”