Bitondo bya Aguri
30
1 Bitondo bya Aguri mwana wa Yake, u bulengania bwage: Muntu wono atendile ku Itieli nu Ukali bunee: 2 “Lebelebe nsili na menge anga bantu, nu nsili na bumenyinino bwa muntu. 3 Nu nsigisizibwe menge, aba nsizi bumenyinino bwa Wozo Wasililila.
4 Nazi wabakamine kwigulu nu nazi wakumbile gansi? Nazi wakungikile lumpumpu na makasa mage? Nazi wakandile mazi mu nsulu zage? Nazi use wasila kwimika ntungo insania za kisi? Izina lyage nazi? Nu izina lya mwana wage nazi? Ndi ulizi, nti mbule lyo.
5 N'iyuki n'iyuki lya Kalaga lili isoga, We eli ngabo za babo bakumukatizia. 6 Ntutalikile lingo iyuki ku moki mage, anakivwa kukuzugila nu nti wamoneka muza. 7 Nakusegile bitondo bibili, ee Kalaga, ntunime byo lwabusio lwa kukua kwane. 8 Ntikizye bwengelezi nu bitondo binsania bya buza, ntumbike muzambi aba mugumi, ndisie tugu n'idia linanikutia, 9 nsyembuke nunse buno ninakivwa kukusomba, nu nti nise natenda bunee: ‘Yehowa eli nazi?’ Aba nsibe nunse muzambi buno ninakivwa kwiba nu kunyega izina lya Kalaga wane buliabulia.
10 Ntusongele mukiti buza ku mukota wage, anakivwa kukuswilila, nu kabamba kanavwa kuba kuguli.
11 Kuli kibuti kimozi kya bantu kikuswililaga isibo, takikukasa mponga ku ninabo. 12 Kuli kibuti kimozi kikwikengelaga buno kili kisoga, tondo takyengibwa ku bubi bwakyo. 13 Kuli kingo kibuti kimozi kikwikotia kankanka, nu kili na meiso ma kabenga kankanka. 14 Kuli kibuti kimozi kyili na meinyo meli anga myene za nganda, nu mbanga zabo zili anga myene mikali, buno balie bazambi, buno babatikye ga kisi nu bazambi munkatini mwa bantu.
15 Lusunde luli na bana babili bamukazi bakulilaga kankanka bunee: ‘Nkase! nkase!’ Kuli bintu bisatu bitakwembukaga nunse, nu binazi bitakutendaga nunse bunee: ‘Byakuka.’ 16 Nsinda nu mukikulu mugumba, nu bilongo bibyo bikubombagia mazi, nu keiya kako katakutendaga bunee: ‘Bwakuka.’
17 Liso lilyo likubenga isi nu litakwanza nina, tuzoni twa mpinga tukalibotola nu byana bya ndiu bikalilia.
18 Kuli bitondo bisatu nunse bikunangamagia; lingo kuli binazi binsikumenyininaga. 19 Bubo bukwendaga ndiu mu mpelela, nu bubo bukwendaga nzoka ga lwanda, nu bubo bukwendaga bwato mu kitatenge, nu bubo bukwendaga wamulume gamozi na wamukazi.
20 Lukita lwa mukikulu kitazi luli bubuno, kungwa akulia nti einyonyona ku busundo, nu nti akutenda bunee: ‘Nsyakita bubi.’
21 Kisi kikugiliminaga ku kabamba ka bintu bisatu, nu ku binazi bikitanavwama kwikalila: 22 Kungwa mukobe aba mukota, nu kikongolo kungwa embuka n'idia; 23 nu mukikulu kigilwa kungwa asongwa, nu kungwa kalemba kasigala gabezaga kilanga.
24 Mu kisi muli bibumbwa binazi bikeke nunse kutinga bingo ku bukeke, tondo bili na menge nunse: 25 binkete tabili na magala, tondo bikwibikilaga idia mu nkungu za kilimo; 26 Nu kuli nyama nkeke zikususania kiko, tazili na menge tondo zikwiyombekaga mu kalimba; 27 nu nzige tazili na mukota, tondo insania zikulengaga gamozi; 28 munswanana anakatwa na maboko, tondo agomia mu numba za bakota banene.
29 Kuli bisatu bili bisoga mu kwenda, lebelebe binazi bisoga ku kwenda: 30 kimbwe eli na magala kutinga nyama insania, nu ntakubembuka nyama insania; 31 farasi za bita, nu bilimba bya mpene lingo, nu mukota nkungu zeli gamozi n'iyombo lyage.
32 Ndi wakitile ku bukongolo nu kwizanzula, aba ndi wakengede bubi, bika kuboko kwobe ku kanua kobe.
33 Kubuno kupota mabele kukubasia bugema, nu kupota mwembe kukubasia mikila, ububo kubakamizia bongoa kukulusia nsake.”