29
1 Wozo ukusungulwa mambizi mengi nu ntakungwa, nti abeleke kitangalabesi geteli nzila za konibwa. 2 Kungwa beisanana bangata nti bantu babogeboge nunse, tondo kungwa muntu mubi angata bantu nti bababalwe.
3 Muntu wozo ukulonda menge akubogiabogia isi, tondo wozo uli kilemba kya bakikulu bitazi nti azimizie bikulo byage.
4 Ku bwisanana mukota akwimika kisi busoga, tondo wozo ukutunda nkaso za bwengelezi akukibigia.
5 Wozo ukwitananizia buliabulia ku munyage, nti akumutegela ikila lya kumukikitania.
6 Mu kwaga kwa mwagi muli itega, tondo wisanana akwimba nu nti akubogaboga.
7 Wisanana eizi bitondo bya bazambi, tondo muntu mubi ntanakengela tanga ku bubo.
8 Bantu beililiki bakulubikanagia mwino, tondo bantu beiya menge bakubotya bongoa.
9 Kungwa muntu wa menge akwakanania na kikongolo, kungwa akongoa aba akuseka, nti takuli bubobelelo.
10 Bantu bakutunda kubasia mikila bakusombaga beiya bulili, tondo beisanana bakulanga kalamo kabo.
11 Kikongolo ntakusigaga kampa mu bongoa, tondo mwiya menge akwisungulaga mu bongoa bwage nu kububotya.
12 Kungwa mukota akungwilila buza, nti bakiti bage bansania babe babi.
13 Muzambi nu musungia bakukulumana, Yehowa ukusania kyengi ku meiso mabo bobabili.
14 Mukota wozo ukusungia muzambi na kwisanana, kisumbi kyage kya bukota kikeizizia kankanka.
15 Kususulwa nu kuzugilwa kukukasana menge, tondo mwana wozo ukusigwa wenyene akwitia nina na nsoni.
16 Kungwa bagi bangata nti bubi bwitila nunse, tondo beisanana bakamona ku kukoloka kwabo.
17 Sungia mwana wobe nu we akumuzie, ububo akubogiebogie.
18 Kungwa takuli tulolesio, nti bantu tabakwidanga, tondo wozo ukulanga makakizio nti eli na mbogimbogi.
19 Mukobe ntakusungulagwa na kutenda tugu, aba anamamenyinina tondo ntananza.
20 Ndi wamonine ku muntu wozo ukusasia kutenda? Nti buli busoga kulemanina kikongolo kumutinga.
21 Wozo wakuzia mukiti wage na lutundo kutukila bwana bwage, kusila kwage abe anga mwana wage wakubuta.
22 Muntu wa bongoa akusakamizagia nsake, nu muntu mukali akwitilaga kwaga.
23 Lwikotio lwa muntu lukumusigulizia, tondo muntu wakwibotya anzwe.
24 Wozo wagomia na mwibi asomba kalamo kage wenyene, mu nkungu za kulondola ntatende kyampa.
25 Kukua bantu boba kuli itega, tondo wozo ukulemanina Yehowa abe na bubobelelo.
26 Kuli beingi bakulondaga kukutibwa na mwangati, tondo bwisanana bukutuka ku Yehowa.
27 Muntu mubi akusombwa na babo beisanana, nu wozo ukukita bwisanana akusombwa na mwiya bwagi.