Kalaga akuliga bantu anga buli misako zabo.
28
1 Mwagi akwitinaga nu ntakuyangwa na muntu, tondo wisanana eli mukali anga kimbwe. 2 Kungwa kisi kiyala na bantu batunda bita nti bakota babe beingi, tondo bantu ba menge nu bumenyinino bakisondelezie mu bubobelelo.
3 Muzambi wozo witila musosu ku byage eli anga mbula zikuloka na magala, nu tazikusiga kiyikanwa kyampa.
4 Bantu batakwanza makakizio bakukakaga mwagi, tondo babo bakwanza makakizio bakwakananagia nabo.
5 Bantu bakukitaga bubi tabakumenya bwisanana, tondo babo beizi Yehowa u beizi bubo bunsania.
6 Nibinibi muzambi ukwenda mu bubobelelo, kutinga mugumi ukwenda mu nzila ziteisanana.
7 Wozo ukwanza makakizio nti eli mwana wa menge, tondo wozo wagomania na biliagundu akwitia isi na nsoni.
8 Na wozo ukutalikila bikulo byage ku kumona mutali, akubikundamania ku wozo wakwile muzambi kyombo.
9 Na wozo utakuziga kungwa mulembe, aba masego mage meli nsese nunse.
10 Wozo ukuluta wisanana mu nzila mbi, akoloke mu muzinga wage wenyene, tondo beiya bulili bakapiena busoga.
11 Mugumi akwikengelaga buno eli na menge, tondo muzambi uli na bumenyinino akumusongolola.
12 Kungwa beisanana bakinda nti kuli lutanuno lunene nunse, tondo kungwa babi bangata nti bantu beibisa.
13 Wozo ukubisa bwagi bwage ntasigililwe, tondo wozo ukwigonga bo nu kubusiga nti akwilwe kyombo.
14 Wozo muntu ukwanza eli na mbogimbogi bindi binsania, tondo wozo ukulimbania mutima wage akaba na tubebe.
15 Mwangati mubi wa bazambi eli anga kimbwe kikuzuga, nu anga dubu zikukua na nzala.
16 Mwangati uteli na bumenyinino nti akusungia bukali, wozo ukusomba ntundo zitaswaga bindi byage byatalikilwe.
17 Wozo uli na mpipi za kwita ungo muntu anatina aba ku nsinda, nu ungo ntamusunge.
18 Wozo ukwenda mu bwisanana akonibwa, tondo wozo uli na myango mu nzila zage insania agoe nunsania.
19 Wozo walima isoa lyage nti embuke idia, tondo wozo ukuyanga bukongolo abe na muzambo wa kubengwa.
20 Muntu mukatizia abe na mponga ningi, tondo wozo ukutundaga kusasia kuguma ntakeida kusungibwa.
21 Kukutya bantu takusoga, tondo kuli bantu bakwaga ku kabamba k'idia ikeke.
22 Wozo uli na nduma akutunda kusasia kuba mugumi, nu nti nteizi buno kwiyanina kwamubasile.
23 Wozo ukuzugila muntu, kumbusa abe na lwanzo, kutinga wozo ukumutananizia tugu na kanua.
24 Wozo ukwiba bikulo by'isi aba nina nu kutenda bunee: “Bubuno tabuli bwagi,” wozo muntu eli mwida wa mwiti.
25 Wozo uli na mutima wa nduma akuyukagia nsake, tondo wozo ukulemanina Yehowa abe na binsania bisoga.
26 Wozo ukulemanina mutima wage wenyene eli kikongolo, tondo wozo ukukita na menge akonibwa.
27 Wozo ukukasa muzambi ntakeiyanina kena, tondo wozo utakulola kweli nti abe na biswililo byingi.
28 Kungwa babi bakinda nu kwangata nti beisanana bakwibisa, tondo kungwa babi bazika nti beisanana bitile nunse.