Muntu ntikake wenyene.
27
1 Ntwikake ku lubi, kubuno ntwizi bwabe lelo. 2 Ungo muntu akuganune, tondo ta kanua kobe uwenyene, mugeni akuganune tanga, tondo ta milomo zobe uwenyene.
3 Makozi meli mazitu nu misege zili mizitu, tondo bongoa bwa kikongolo u buzitu kutinga bibyo bibili.
4 Bongoa buli bubibu nu kasungu keli anga mwiyalo, tondo nazi unemana lwabusio lwa lugi?
5 Kubulilila kuli kusoga kutinga lutundo lwabiswa.
6 Byulu byakwita kilemba kyobe byili bya bukatizio, tondo kumuma ku matama kwa mwiti wobe kuli na bwengelezi.
7 Na wozo wembuka nti es'asomba lukeke lwa buuki, tondo ku wozo ukukua na nzala kinsania kili lubaba nti kise na nse.
8 Anga bubo bukutimbagatimbaga kazoni bulazi na kizumba kyako, ububo buli muntu wa ngendo kankanka kusiga kiziki kyage.
9 Makiti nu bulago bikubogagiabogagia mutima, ububo busoga bwa lwango bukutuka ku mutima wa kilemba kya muntu bukumubogiabogia.
10 Ntusige kilemba kyobe aba kilemba kya so, nu ntwende ku numba za mubuto wobe mu busi bwa kabebe kobe; nibinibi kilemba kili bwigi kutinga mubuto uli bulazi.
11 Mwana wane, ba na menge, nu bogiabogia mutima wane, nu nakule wozo ukunswilila.
12 Mwiya menge akumona bubi nu akwibisa, tondo bikongolo bikwenda mubo nu babe na tubebe.
13 Kungwa waligila mugeni nsombi zage nti watola nsulu zage, nu kata zo anga idagano lya mukikulu mugeni.
14 Ndi muntu akukasa kilemba mponga n'iyuki lya kulaluka nindunindu, nti akengelwe tugu buno amuswilila.
15 Kutogatoga kwa mamata ma mbula nnene, ububo buli mukikulu wa kazege; 16 wozo ukutunda kumusunga nti akusunga lumpumpu, nu kukata makiti mu ikasa.
17 Kyuma u kikuyikilaga kingo kyuma, ububo bukusania muntu kilungi kya kilemba kyage.
18 Wozo ukulanga muti wa biguma nti u walie ku biguma byago, nu wozo ukulanga mukota wage nti anzwe nage.
19 Anga mu mazi kilungi kya muntu kikumonekako, u bubo buli mutima wa muntu ku munyage.
20 Kiziki kya bakuzi Hadese nu lukuo tabikwikutaga nunse, nu meiso ma muntu tamakwembukaga nunse.
21 Nyungu za kyuma zikwengia feza nu iyambi lya keiya likwengia olo, ububo bukulindikwa muntu na lwanzo lwage.
22 Gonatuta kikongolo gamozi na ngano, bukongolo bwage tabunatuka.
23 Ba na komanizia kumenya buni buli bituganwa byobe, nu ikasane ku bituganwa byobe; 24 Kubuno iguma talikwikalaga kankanka, nu bukota tabuneikala milyalya nu milyalya. 25 Nsolu zikuyulagwa nu bisugu bibisi nti byamoneka, nu bisugu bya miduko byakalwe. 26 Ku byana bya mikoko u kuwatikye nsulu, nu mpene u zili bukunza bw'isoa, 27 nu mabele ma mpene mabe idia lyobe, nu idia ku kikanga kyobe, nu nkindi ku bakambi bobe.