Bikongolo nu basosu tabeli na lwanzo.
26
1 Anga lubula mu nkungu za kilimo, nu anga mbula mu nkungu za matubulo, ububo lwanzo talwaswaga ku kikongolo. 2 Anga bukulengaga kilegeza, nu anga bukutamba kantamba, ububo buli kiswililo kiteli na kabamba takyakite bwampa
3 Kasusula keli ku farasi nu mizigi za kusondelezia ku mpunda, nu kasusula keli ku mugongo wa kikongolo.
4 Ntwakule kikongolo anga bukongolo bwage, buno unavwa kukisusania.
5 Akula kikongolo anga buli bukongolo bwage, anakivwa kwikengela buno eli na menge.
6 Wozo ukusinga musagu ku kuboko kwa kikongolo eli anga wozo ukwisesa magulu nu kwimanina mbabazio.
7 Magulu ma kitunga matamba nunse, ububo buli misumo mu tunua twa bikongolo.
8 Kwanza kikongolo kuli anga kukanda ikozi mu nkumbi.
9 Misumo mu kanua ka kikongolo zili anga mikele mu ikasa lya wakatwa na maku.
10 Wozo Munene wabumbile binsania akuliga kikongolo lukalilo nu beiya bwagi nkalilo zabo.
11 Kikongolo kikusubagia ku bukongolo bwakyo, anga bubo bukusubagia mboa ku bisazi byasalaga.
12 Ndi wamona ku wozo ukwikotizia menge? Nibinibi kulemanina kikongolo kutinga we.
13 Musosu akutendaga bunee: “Mu nzila muli kimbwe, kimbwe kili mu nzila nnene.”
14 Anga bubo bukutimbaga lwibi ga kitiko, ububo bukubezaga musosu ga mugu.
15 Muntu musosu akubikaga kuboko g'ikaso, tondo ntakuvwama kwidisia.
16 Musosu akwikengelaga buno eli na menge kutinga bantu mutubakamo bakwakula na menge.
17 Wozo ukwingila mu nsake ziteli zage, eli anga muntu ukukata mboa zaatatugile ku matuzi.
18 Anga bubo bukwisaga musile bisingu bya keiya, nu misungu za lukuo, 19 ububo buli muntu ukwengelela munyage, nu kusila nti atenda bunee: “Ndi nsyayanaga tugu?”
20 Geteli nkuzi keiya nti kazima, nu geteli nsongania nti tageli nsake.
21 Anga bubo bukubangagia makangania keiya, nu anga buli nkuzi gantata keiya, u buli muntu uli nsongekania, akubakamizagia nsake.
22 Bitondo bya nsongania bili anga idia lili nse, tondo bikusumita nunse mutima.
23 Kanua kabi nu mutima mubi zili anga idega lyakukilwa n'itampo.
24 Wozo musombi akutenda na bwengelezi, tondo mu mutima wage akubulanga. 25 Nu kungwa akutenda busoga ntumukatizie, kubuno eli na bitondo mutubakamo bya lusombo mu mutima wage. 26 Aba lusombo lwage lunabiswa mu bwengelezi, tondo bubi bwage bwamenywe mu musanganano wa bantu.
27 Na wozo ukumba muzinga nti akoloke mugo, nu na wozo ukukumbia ikozi nti lyamukumbile.
28 Lulami lwa bwengelezi lukusombaga babo balukubabazia, nu kanua kakwikaka kakulusagia bubi.