25
1 Zeno zili ingo misumo za Solomono zasanzilwe na bantu ba Hezekia mwangati wa Yuda. 2 Kuli lutanuno lwa Kalaga kubisa bitondo, tondo lutanuno lwa bakota luli kumenyinina bitondo.
3 Anga bwasakama igulu nu anga buli kuzinda kwa kisi, ububo buli mitima za bakota tazinamenywa.
4 Tikya nsese ku feza, nu feza nsoga zende ku mutumbi u kwatuke kintu kya malebo. 5 Tikya bagi lwabusio lwa mukota, nu kisumbi kyage nti kyalinde mu bwisanana.
6 Ntwiganune uwenyene ku mukota, nu ntwemane munkatini mwa bantu banene. 7 Nibinibi kubulwa bunee: “Vwa gano lwabusio lwane,” kutinga kubengwa lwabusio lwa mukota.
8 Ntusasie kwenda ku mulondo, kubuno ntwamenye buni buwakite ku kuzinda, embe munyobe akwitie na nsoni. 9 Longeka bitondo byobe na munyobe, nu ntusole kakungu ka ungo muntu. 10 Nu wozo ukungwa anavwa kukwitia na nsoni, nu bubo lukumu lwobe lusoga lwatuke.
11 Bitondo bisoga byatendwa mu nkungu nsoga bili anga biguma bya olo bili ga lupepe lwa feza.
12 Anga bubo buli mugone wa olo nu malebo masoga ma olo, u buli lusungu ku wozo uli na menge nu kutuzi kukungwilila.
13 Anga buli mwaso wa lubula ku busi bwa kutubula, ububo buli mugenzi wisanana ku babo bamusinga; akubogiabogia mitima za bakota bage.
14 Wozo ukwikaka ku lukaso lweteli nalo eli anga lutundutundu nu lumpumpu luteli na mbula.
15 Kwikalila kukugalukya mukota, nu kanua kasoga kakubungula makwa.
16 Kungwa wamona buuki, lia bwaswaga kuguli, kubuno ndi walia bwingi, nti wabusale.
17 Busoga kubasa ku numba za munyobe limozi limozi, anavwa kukutwa nobe nu kukusomba.
18 Wozo ukweka munyage buza eli nondo nu mwene nu musungu mukali.
19 Kulemanina wozo uli na lutundo lwa bwengelezi mu nkungu za lusungio kuli anga linyo lyakalika, nu kugulu kwaginyuka.
20 Wozo ukwimbila muntu uli na kabebe mu mutima, eli anga ukwikungula nsulu mu nkungu za mpego, nu anga maku mabikwa ga byulu.
21 Kungwa wakusomba akukua na nzala, nti wamukasa idia, nu kungwa akukua na mpusia, nti wamukasa mazi. 22 Kubuno nti wamubikila makangania ma keiya g'itoe lyage, nu Yehowa akukase lukalilo.
23 Anga kisoa kyatuka ku lulenge lwa kwikazi lwa kisi kikulokagia mbula, ububo kanua ka buza kakulusia bongoa.
24 Nibinibi kwikala gantata mutondo wa numba kutinga kwikala na mukikulu wa kazege kankanka.
25 Musagu musoga ukutuka bulazi guli anga mazi makwasa ku wozo uli na mpusia.
26 Kungwa wisanana akindwa na mwiya bwagi eli anga kanuabalongo kalubukilwa.
27 Tabusoga kulia buuki bwingi, nu buli bubi nunse muntu kwidolesia lutanuno lwage wenyene,
28 Wozo utakwangata mutima wage eli anga mwino wazima nu guteli lingo na mukolo.