Kusigilila bwagi nu kugomania na bantu.
24
1 Ntube na lugi ku bantu babi, nu ntutunde kugomia nabo. 2 Kubuno mitima zabo zikukengela bwiti, nu tunua twabo tukutenda bubi kankanka. 3 Numba zikobakwa na menge, nu zikulindibwa na bumenyinino. 4 Nu ku bumenyinino masio makwiyala na bya bukunza bukali, nu bikutananizia. 5 Muntu wa menge eli na magala, Nu muntu wa bumenyinino akutalikila magala. 6 Kubuno ku lwango lwa menge u kuunakita bita, nu ku bwingi bwa basunguzi kuli bukindi.
7 Menge matinga makengelo ma kikongolo, nu musanganano ntatende kampa.
8 Wozo ukukala lwango lwa kukita bubi, bantu banamumana buno mukazi wa lwango lubi. 9 Ikengelo lya kikongolo lili bwagi, mwiya kabenga akusombwa na bantu.
10 Ndi watamba mu busi bwa kabebe, nti magala mobe meli makeke.
11 Onia babo bakwekwa buno beitwe, nu babo beli bwigi na kusungibwa basungile. 12 Ndi watenda buno tatwamenyagile kikino kitondo, ndi Kalaga ukulindika mitima ntanakimenya? Nu wozo ukulanga kalamo kobe ndi ntanakimenya? Nu ndi ntanakasa na muntu na muntu anga buli mulimo wage?
13 Mwana wane, lia buuki kubuno buli busoga, nu lukeke lwa buuki luli nse nunse ku kanua kobe. 14 Ububo buli menge ku mutima wobe, kungwa wamakata mabe mutali kuguli, nu kilemanizio kyobe takyatikibwe.
15 Uwe mubi, ntukobele numba za mwiya bulili, ntunyage kiziki kyage kya kumunwa. 16 Kubuno wisanana anagoa mambizi mutubakamo nu azanzuke lingo, tondo bagi bangatwa na mibi.
17 Ntubogeboge kungwa wakusomba agoa, nu mutima wobe tagubogeboge kungwa akikitana. 18 Yehowa anavwa kubumonako nu ntatananizibwe nabo, nu agalukye bongoa kweli.
19 Ntwikutie ku kitondo kya babo beiya bwagi, nu ntube na lugi ku beiya bwagi. 20 Kubuno muntu mubi ntakaba na mutali, kasuku ka mwiya bwagi kazime.
21 Mwana wane, kua Kalaga boba nu mukota, nu ntugomie na babo bakutunda kugalukya bitondo. 22 Kubuno lusungio lwabo lwabase kitangalabesi, nu nazi wizi lusungio lwatuka ku babo babili?
23 Bitondo bibino u bya beiya menge:
Kukutya muntu mu nkungu za kwatula mulondo takusoga. 24 Wozo ukutenda ku mubi bunee: “Uli wisanana,” bantu nti bamwililike, nu baBilongo bamusombe. 25 Tondo babo bakumuzugila babe na mbogimbogi, nu mponga zabe kubeli.
26 Wozo ukwakula na bulili, nti eli anga ukumuma ungo ku matama.
27 Kita mulimo wobe busoga kumbuga, nu kunga isoa lyobe busoga, nu obaka numba zobe busoga.
28 Ntukandike munyobe kitondo. aba ntweke buza na kanua kobe. 29 Ntutende bunee: “Nkumukitila anga bwankitide, nalige muntu wozo anga buli mulimo wage.”
30 Natingile mu ntungo mw'isoa lya musosu, nu mu ntungo mw'isoa lya mizabibu za wozo uteli na menge, 31 nu kunsania mulyo kwasila kwasa mikele, nu mulyo kunsania mwabezaga kalungi, nu mukolo walyo wabunguka. 32 Nu ganamonine ku bubo nu kukengela nunse, nakatile meigisia buno: 33 Nkungu emozi kuzenzela nu engo nkungu kwiyombeka, nu engo nkungu kukumba maboko buno wiyombeke, 34 Nu buzambi bwakubasile anga munyagi, nu kwiyanina kwobe anga muntu wavwala ngabo.