Meigisia ku muntu wa Kalaga.
23
1 Kungwa ukulia na mukota, kengela wozo uli lwabusio lwobe, 2 nu bika mwene g'ikosi lyobe, ndi uli kiliagundu. 3 Ntutunde idia lyage lili nse, kubuno lili idia lya bwengelezi. 4 Ntwikutie buno ube mugumi, siga tanga kulemanina menge mobe. 5 Ndi ukulemanina bikulo byazimine? Kubuno bikulo bili na byupi, anga ndiu zikulenga mu mpelela.
6 Ntulie idia lya wozo ukukanda malanga, nu ntutunde idia lyage isoga. 7 Kubuno bubo bukukengela muntu mu mutima, ububo bweli; anatenda nobe bunee: “Lia nu nua,” kasi ntakukutunda. 8 Idia lilyo liwasila kulia walisale, nu bitondo byobe bisoga byazimine.
9 Ntutende na kikongolo, kubuno abenge tugu moki mokumutenda.
10 Ntutikye kakengelezio ka myaga za wakalazi, nu ntwende mu masoa ma nkubi. 11 Kubuno Mukuluzi wabo eli na magala, abatendele mu bitondo byabo.
12 Bika mutima wobe ku meigisia, nu ungwilila ku bitondo bya bumenyinino.
13 Ntwime mwana wobe kasusula, kubuno unamususula na kasusula ntanakua. 14 Kungwa wamususula na kasusula, nti wonia kalamo kage ku bakuzi.
15 Mwana wane, kungwa mutima wobe guli na menge, nti mutima wane wabogeboge nunse. 16 Nu mutima wane wabogeboge, kungwa kanua kobe kakutenda bwisanana.
17 Mutima wobe tagube na lugi ku beiya bwagi, tondo kua Yehowa boba musi nu kindi. 18 Kubuno lebelebe kuli lukalilo, nu kilemanizio kyobe takikatikibwa.
19 Mwana wane, ungwilila nu ba na menge, nu sondelezia mutima wobe mu nzila nsoga. 20 Ntwikale gamozi na banuzi ba maku, nu gamozi na biliagundu bya misuna za nyama. 21 Kubuno banuzi ba maku nu biliagundu, kuzinda kwabo muzambo, nu wozo ukwiyombeka kankanka avwale nsulu zatika.
22 Anza so wozo wakubutile, nu ntusombe nyoko kungwa eseli mukungu. 23 Kunza bulili aba ntubukunzie; kata menge nu meigisia nu bumenyinino. 24 Isi wa wozo uli wisanana nti abogeboge nunse, nu wozo wabutile mwana mwiya menge abogibwebogibwe nage. 25 So nu nyoko babogeboge, nu wozo nyoko wakubutile abogeboge.
26 Mwana wane, nkase mutima wobe, nu meiso mobe matananizibwe mu nzila zane. 27 Kubuno mukikulu kitazi eli anga muzinga mulazi, nu mukikulu mugeni eli kyundundu kyabumbutana. 28 Akukobela anga mwibi, nu akutalikila bengelezi munkatini mwa bantu.
29 Nazi uli na kabebe? Nazi ukwina mutima? Nazi uli na nsake? Nazi uli na manungunungu? Nazi uli na byulu geteli kabamba? Nazi uli na meiso makisimana? 30 Babo bakwikala nkungu ndazi ku maku, babo bakwendaga kulonda maku makali. 31 Ntulole maku kungwa makisimana, nu mu nkungu zimakusasa mu kituma, nu mu nkungu zimakugela bukebuke ga mungolu. 32 Kumbusa makutwa anga nzoka, nu makutaba anga mpoma. 33 Meiso mobe mamone bitondo biteli go, nu mutima wobe kutenda bitondo bitatunganana. 34 Nu wabe anga muntu wiyombeka mu kitatenge, nu anga muntu ukwiyombeka ga kansinsi ka bwato. 35 Watende bunee: “Bandibwide nu nsyababalwa, nu bansusula tondo nsyungule kyampa, nu nayuke nkungu nkizi buno nende kumalonda lingo?”