22
1 Nibinibi kusombola izina isoga kutinga bugumi bwingi, nu mponga nsoga kutinga feza nu olo. 2 Bagumi nu bazambi bakukulumanaga gamozi, Yehowa u wababumbile bobabili.
3 Mwiya menge anamona ku bubi nu nti eibisa, tondo bikongolo bakwendelela nu kubabazibwa.
4 Kwibotya nu kukua Yehowa boba kuli bugumi nu lutanuno nu kalamo.
5 Mikele nu matega meli mu nzila za mwengelezi, tondo wozo ukulanga kalamo kage abe bulazi namo.
6 Igisia mwana mu nzila zaatunganana kwenda muzo, nu gaakaba mukungu ntakazisiga lingo.
7 Mugumi akwangataga muzambi, nu wozo ukwamba nsombi eli mukobe wa wozo wamukasa zo.
8 Wozo ukuyika bwagi akatubula lukuo, nu kasusula ka bongoa bwage kakazika nunse.
9 Wozo ukukita busoga akaswe mponga, kubuno akukasana idia lyage ku bazambi.
10 Pumbia mwililiki nu nsake nti tazabe lingo, nsake nu bilingano nti byasile.
11 Wozo ukutunda mutima musoga nu kutenda moki masoga, nti mukota abe kilemba kyage.
12 Meiso ma Yehowa makulanga bumenyinino, nu akugalukagia bitondo bya mwengelezi.
13 Musosu akutendaga bunee: “Kumbuga kuli kimbwe, nitwe mu nzila.”
14 Tunua twa bakikulu bageni tuli muzinga mulazi, nu wozo ukusomba Yehowa nti akoloke mugo.
15 Bukongolo buli mu mutima wa mwana, tondo kasusula ka lusungu kanabutikya nunse.
16 Wozo ukusungia muzambi buno eitalikile bikulo byage nu wozo ukukasaga bagumi migelo, kuzinda kwabo kuli kwiyanina.
17 Tegekela nu ungwilila tanga bukutenda mwiya menge, nu bika mutima wobe ku bumenyinino bwane, 18 kubuno bubo buli bwaswaga kungwa wabulanga mu mutima wobe, nu kungwa wabubika ku kanua kobe. 19 Nakwigisia lelo, buno kilemanizio kyobe kibe ku Yehowa. 20 Ndi nsyakusanzila nunse bitondo byingi bisoga, nu bya nango nu bya bumenyinino, 21 Kukwigisia lebelebe bitondo bya bulili, buno utende bitondo bisoga bya bulili ku babo bakukusinga?
22 Ntunyage muzambi buno eli tugu muzambi, aba kusungia muzambi mu isula lya mwino. 23 Kubuno Yehowa abalongekele bitondo byabo, nu kwita babo bakubanyaga.
24 Ntube kilemba kya mwiya kasungu, nu ntwende gamozi na muntu wa bongoa bukali. 25 Ntuyange nkita zage, buno zinavwa kubigia mutima wobe.
26 Ntube umozi wa ku babo bakututa nkasa, nu anga wa ku babo bakulumbila kuliga nsombi. 27 Kungwa ntuli na kyakuliga, bakunyage aba mugu wobe?
28 Ntwigie mwaga wabikilwe wakalazi, wozo wabikilwe na baso.
29 Ndi wamona ku muntu wozo uli na komanizia mu mulimo wage? Amanwe lwabusio lwa bakota banene, nu nteikale na bantu batakumenyininwa.