Kalaga akusondelezia mitima.
21
1 Mutima wa mwangati guli ku maboko ma Yehowa, nu akugusondelezia kunsania kwakutunda anga luuzi lukugela. 2 Nzila insania za muntu zisanana ku meiso mage, tondo Yehowa u wozo ukulindika mitima.
3 Kukita bulili nu bwisanana kukutananizia Yehowa kutinga bisansa.
4 Meiso ma kabenga nu mutima wa lwikotio, u kasuku ka mubi, bili bwagi.
5 Makengelo ma mwiya komanizia makulusia mutali nunse, tondo wozo ukusasia kukita akwiyanina kankanka.
6 Kumona isuku na lulami lwa bwengelezi kuli anga muuki ukutimbatimba gano nu gago, ku bakulonda lukuo.
7 Kabenga ka babi kakabeita, kubuno bakunana kukita bwisanana.
8 Muntu mubi akuyanga nzila zikutimbatimba nunse, tondo mulimo wa wisanana guli wisanana.
9 Buli busoga kwikala gantata mutondo wa numba, geteli kwikala na mukikulu wa kazege kankanka.
10 Mutima wa mubi ukutundaga bwagi kankanka, nu ntakwile munyage kyombo.
11 Kungwa mwiya nguza asungibwa nti kikongolo abe na menge, nu kungwa mwiya menge akusungulwa nti akate bumenyinino.
12 Wozo Wisanana eizi nunsania numba za mwiya bwagi, nu akubazikya ku kabamba ka bwagi bwabo.
13 Na wozo waziba matuzi mage ku kulila kwa muzambi, nu we gaakalila ntakongwililwa.
14 Lukaso lwa lumbisombiso lukubobelezagia bongoa, nu lukaso lwabiswa mu nsulu ga bukuba lukubobelezia bongoa bukali.
15 Buli mbogimbogi ku beisanana kukita bwisanana, tondo buli buzimizi ku babo bakukitaga bubi.
16 Wozo ukutuka mu nzila za bumenyinino, nti abe mu kibombo kya bakuzi.
17 Wozo ukutundaga tugu kwibogiabogia na bya kisi abe muzambi, nu wozo ukutunda maku nu byanona ntabe mugumi.
18 Mubi eli bukuluzi bwa wisanana, nu mwengelezi bukuluzi bwa muntu wa bulili.
19 Nibinibi kwikala mu kalula, kutinga kwikala na mukikulu wa nsake nu kasungu.
20 Mu numba za mwiya menge muli isuku nu makiti, tondo muntu kikongolo akubimena.
21 Wozo ukulonda bulili nu kyombo akulonda kalamo nu bwisanana nu lwanzo.
22 Muntu wa menge akwingila mu mwino wa beiya magala, nu akusambula kiziki kyalanga ky'itinino kya kilemanizio kyabo.
23 Wozo ukulanga kanua kage nu lulami lwage, nti akulanga mubili wage ku kabebe.
24 Muntu wa lwikotio nu wa kwikaka eli mwiya nguza, nu nti akukita mulimo ku bongoa bukali bwa lwikotio.
25 Kutunda kwa musosu kukumwitaga, kubuno ntakuzigaga kukita mulimo.
26 Nu we akusega bindi binsania, tondo wisanana akukasanaga geteli kwimana.
27 Kisansa kya mwiya bwagi kili nsese ku Kalaga, embe lino gaakukikasana na makengelo mabi.
28 Mulongeki wa buza azimine, tondo wozo ukungwilila asambale kankanka.
29 Muntu mubi akukandaga malanga mage, tondo wisanana akwisananagia nzila zage.
30 Aba menge, aba bumenyinino, aba lwango tabinaba gantata ga Yehowa.
31 Farasi zikubikwa kayikayika mu kindi kya bita, tondo kukinda kukutuka ku Yehowa.