20
1 Maku makulusagia mulubu, nu maku makali meli lubanza, nu unsania wakatwa namo nteli na menge. 2 Bongoa bwa mukota buli anga kuzuga kwa kimbwe, wozo ukumwongia nti akwaga mu kalamo kage.
3 Kuli lwanzo lwa muntu ukwidekanukya na nsake, kubuno kikongolo kinsania kikulingia nsake.
4 Musosu ntakulimaga kungwa kuli mpego, tondo mu nkungu za matubulo asege, nu ntamone kampa.
5 Lwango lwa mutima wa muntu luli anga kiziba kizindu, tondo muntu wa bumenyinino alutikye.
6 Bantu beingi bakwikaka na busoga bwabo, tondo buni bunamoneka wisanana?
7 Muntu wisanana akwenda mu kwisanana kwage, nu bana bage bakukitagwa mponga kumbusa kwage.
8 Kungwa mukota eikala ga lusu lwa milondo, nti akubalangania bubi na kisozi kyage.
9 Nazi unatenda bunee: “Nengezie mutima wane, nise wasililila, nsili na bwagi lingo?”
10 Buzitu bwengukana nu kilindiko kyengukana, bibyo bibili bikusombwa na Yehowa.
11 Aba mwana akumenywa ku misako zage, buno mulimo wage ndi waswaga aba ndi wisanana.
12 Kutuzi kukungwa nu liso likumona, Yehowa u wabumbile bibyo bibili.
13 Ntwitile kutunda tulo unavwa kuba muzambi, yuka nu wembuke n'idia.
14 Mukunzi akutenda bunee: “Ta kena, ta kena!” Tondo kungwa enda nti es'eikaka.
15 Kuli olo ningi nu makozi ma akiki ma bukunza bubibu, tondo milomo za menge zili anga makozi ma bukunza bunene.
16 Kungwa muntu emana kuba mulongeki ku nsombi zikukata mugeni, tola nsulu zage zibe kyango.
17 Idia lya bwengelezi lili isoga mu kanua, tondo kuzinda kanua keiyale na misege.
18 Na makengelo na makwimikwa na nango, nu kita bita na lwango lusoga.
19 Nsongania akusambalaga tukungu, ububo wibembukye na wozo ukutendatenda.
20 Wozo ukuswilila isi nu nina, kasuku kage kakazimibwa mu kapilo kanene.
21 Ntiko zamoneka lubilo mu kulinga, tondo kuzinda kwazo takwabe na mponga.
22 Ntubule bunee: “Nisube.” Lemanina tanga Yehowa nu akonie.
23 Bilindiko byengukana bikusombwa na Yehowa, kilindiko kya bwengelezi takili kisoga.
24 Yehowa akusondelezia masomoneno ma muntu, nu buni bunamenya muntu matingilo mage mansania?
25 Lili itega ku muntu wisanana kulumbila lubilo bunee: “Bubuno buli bwasililila” nu kumbusa kwibezia ku idagano lyage.
26 Mukota wa menge akulindika nu kutikya babo babi, nu akubasusula nunse.
27 Mutima wa muntu guli kasuku ka Yehowa, kakulonda binsania bili munda mwage.
28 Kyombo nu bulili bikulanga mukota, nu kisumbi kyage kyalindibwe na kyombo.
29 Magala ma mitoka u lwanzo lwabo, nu itoe lili na mbwe u lwanzo lwa bakungu.
30 Tususula nu byulu bikusungulaga bubi, nu kususulwa kukutabaga mu mutima.