19
1 Nibinibi muzambi wozo ukwenda mu bulili bwage kutinga kikongolo kili na myango kankanka. 2 Kukita geteli bumenyinino takuli kusoga, nu wozo ukusasia na magulu mage akukita bwagi.
3 Bukongolo bwa muntu bukumuzimizia mu nzila mbi, tondo mutima wage ukongelwa Yehowa.
4 Mugumi eli na bilemba byingi, tondo muzambi akusombagwa na mibuto.
5 Mulongeki wa buza ntakwidaga kusungibwa, nu wozo watunda buza ntanona.
6 Bantu beingi bakusega na lwanzo ku muntu ukwanzwa, nawe nawe eli kilemba kya wozo ukukasanaga nkaso.
7 Muzambi akusombagwa na mibuto zage, embe lino bilemba byage byamusiga; akutendatenda nabo, tondo tabeligo lingo.
8 Wozo uli na menge akutunda kalamo kage wenyene, nu wozo ukulonda bumenyinino amone busoga.
9 Mulongeki wa buza ntakwidaga lusungio, nu wozo ukweka buza azimine.
10 Kikongolo nteli na kalamo kasoga, nu mukobe ntanangata bakota bage.
11 Menge ma muntu makumunania kongoa lubilo, nu kusigilila bwagi kuli lutanuno lwage.
12 Kongoa kwa mukota kuli anga kuzuga kwa kimbwe, tondo lutundo lwage luli anga mame ma bisugu.
13 Mwana kikongolo eli kabebe ku isi, nu kazege ka mukikulu keli anga imata lya mazi busi na busi.
14 Numba nu bugumi bili bwiyani bukutuka ku babuti, tondo mukikulu wa menge akutuka ku Yehowa.
15 Busosu bukuyamikagia muntu ku kabwebwe, nu musosu akue na nzala.
16 Na wozo ukwanza makakizio nti akulanga mutima wage, nu wozo ukubenga nzila zage nti akue.
17 Wozo ukukwila muzambi kyombo akubika nsombi ku Yehowa, kubuno akamuliga ku makitilo mage masoga.
18 Sungula mwana wobe ndi kukili kilemanizio, tondo ntumubabazie nunsania buno akue.
19 Muntu wa kasungu kakali asungibwe ku kabamba kako; ndi ukumwonia, nti watunganana kumwonia lingo.
20 Ungwilila lusungu nu kata meigisia, buno ube na menge mu bindi byobe bya kuzinda.
21 Mu mutima wa muntu muli makengelo mengi, tondo lwango lwa Yehowa u lulo lwalinda.
22 Kikutundagwa ku muntu u misako zage za bukatizio, nu muzambi eli musoga kutinga muza.
23 Kukua Yehowa boba kukulusagia kalamo, nu wozo uli nabo akaba na bubobelelo
Nu bubi tabukamubasila.
24 Musosu akubika kuboko kwage mu lupepe, nu nti ntakuvwama kukusubya lingo ku kanua kage.
25 Susula mwiya nguza, nu kikongolo abe na menge, nu zugila wozo uli na bumenyinino nu atalikile menge.
26 Wozo ukuzimizia bikulo by'isi nu kwimbya nina eli mwana ukulusia nsoni nu akwimanina lukumu lubi.
27 Mwana wane, ndi walekela kungwilila meigisia, nti walekanuke na moki ma bumenyinino.
28 Mulongeki mubi akwililikaga lusungio, nu tunua twa babi tukumena bwagi.
29 Lusungio lwabikidwe babo bakwililika, nu ngizi ku migongo za bikongolo.