18
1 Wozo widekanukya na banyage akulonda lutundo lwage wenyene, nu akusomba nango nsoga. 2 Kikongolo ntakubogagabogaga na bumenyinino, tondo mu kulolesia makengelo mage.
3 Kungwa bubi bukuvwa, kabenga lingo kabase, nu lukumu lubi lukulusia nsoni.
4 Bitondo bya kanua ka muntu bili anga mazi mazindu, nu kanuabalongo ka menge keli anga luuzi lukeke lukugela.
5 Kubingia muntu uli mubi tabuli busoga, aba kusungia muntu wisanana.
6 Milomo za mubi zikusasia ku nsake, nu kanua kage nti kakuluta bituto.
7 Kanua ka kikongolo kakumubigagia, nu milomo zage zili itega lya mutima wage.
8 Moki ma nsongania meli anga idia lisoga, nu makwingila nunse mu mutima wa muntu.
9 Wozo uli kyoto ku mulimo wage eli mubuto wa wozo ukubigia.
10 Izina lya Yehowa lili itinino lya magala, nu wisanana atinina mulyo nu eli na bubobelelo nunse.
11 Bikulo bya mugumi bili mwino wage nunsania wa magala, nu anga kitutu kyasakama mu makengelo mage.
12 Lwabusio lwa kubigibwa mutima wa muntu ukwikotia, nu kwibotya kukulusia lwanzo.
13 Wozo ukwakula lwa busio lwa kungwilila eli kikongolo, nu akue na nsoni.
14 Mutima wa muntu ukumukasia ku lusambo lwage, tondo nazi unavwama kukasia mutima wa kabebe nunse?
15 Mutima wa mwiya bumenyinino ukusasia kumenya, nu kutuzi kwa mwiya menge kukulondaga bumenyinino.
16 Lukaso lwa muntu lukumumonesagia kiziki, nu lukumubasia lwabusio lwa bantu banene.
17 Wozo mutangi kutenda akumoneka kuba na bulili, tondo muzinda akumwakula mu bitondo byage.
18 Mbale zikulekanukagia myango, nu zikusesa milondo gasamba bakulu banene.
19 Mubuto wasunwa eli mubibu kutinga mwino wa mukolo wa magala, nu nsake zage zili anga kyuma kyalimbania lwibi.
20 Muntu embukye mubili wage na bitondo bya kanua kage, nu embuke na kusambala kwa kanua kage.
21 Lulami luli na magala ma lukuo nu kalamo, nu babo bakulutunda balie biguma byalo.
22 Wozo wasonga mukikulu amona kintu kisoga, nu nti akaswe mponga na Yehowa.
23 Muzambi akusegaga na lusimo, tondo mugumi akwakula tugu na lwikotio.
24 Wozo uli na bilemba byingi nti anabasa ku kabebe, tondo kuli kilemba kimozi kyatundana nage kutinga mubuto wage.