Misako misoga zinakitwa na bantu.
17
1 Nibinibi kulia idia lyoma mu bubobelelo, kutinga numba ziyala na bisagulo nu muli nsake. 2 Mukiti musoga angate mwana wa misako mibi, nu abe na zage ntiko munkatini mwa mibuto.
3 Nyungu za kyuma zikwengia feza, nu iyambi lya keiya likwengia olo, tondo Yehowa ukulindikaga mitima.
4 Mukiti wa mibi akungwaga tugu milomo za babi, nu muza akungwaga tugu lulami lubi.
5 Wozo ukubenga muzambi nti akubenga wozo wamubumbile, u wozo ukubogaboga na mbabazio za bango ntakeida lusungio.
6 Bayukulu beli lutanuno lwa bakungu, nu lwanzo lwa bana u beisibo.
7 Kutenda kusoga takukutananinaga mu kanua ka kikongolo, ububo buli buza tabukutananizia mukota.
8 Lukaso luli anga makozi ma bukunza bubibu ku wozo walukaswa, na kunsania kulukwenda lwabe lusoga.
9 Na ukukukila mibi nti akulonda bulemba, tondo wozo ukubukengela alekanukya bilemba.
10 Muntu wa menge akusasagia kungwa lusungu, kutinga tususula lukama twigisia kikongolo.
11 Muntu mubi akulondaga buguni kankanka, ububo asingilwe mugenzi mukali.
12 Busoga kukulumana na dubu zaziminwa na byana, kutinga nunse kikongolo ku bukongolo bwakyo.
13 Wozo ukusubya bubi ku busoga, bubi tabukatuka mu numba zage.
14 Kulinga kwa nsake kuli anga kwimuna mutumba, ububo sigazi myango lwabusio lwa kubasa kwa nsake.
15 Wozo ukubingia mubi nu wozo ukusungia wisanana, babo babili bakusombwa na Yehowa.
16 Bikulo bili na mutali mukizi mu kuboko kwa kikongolo buno akunze menge, nu we nteli na bumenyinino?
17 Kilemba eli na lutundo nkungu insania, nu mubuto abutilwe kukasia mu nkungu za kabebe.
18 Wozo uteli na menge akututa nkasa za kulumbilila munyage ku kabamba ka nsombi zage.
19 Wozo ukutunda nsake nti akutunda bwagi, nu wozo ukusakika lukumu lwage nti akutunda kukua.
20 Wozo uli na mutima wa bwengelezi ntanamona busoga, nu wozo uli na kanua ka myango agoe mu milondo.
21 Wozo wabuta kikongolo eli na kabebe, nu isi wa kikongolo nteli na mbogimbogi.
22 Mutima ukubogaboga guli muti musoga, tondo mutima watamba ukomia makwa.
23 Muntu mubi eitabizia lukaso mu lumbisombiso, buno agalukye nzila za bwisanana.
24 Menge meli lwabusio lwa muntu wozo uli na bumenyinino, tondo meiso ma kikongolo meli ku kuzinda kwa kisi.
25 Mwana kikongolo nti eli kabebe ku isi, nu anga ngigi ku nina wamubutile.
26 Kulinga beisanana tabusoga, aba kulibula mitonge ku kwisanana kwabo.
27 Wozo ukwisungula mu kutenda nti eli na menge masoga, nu wozo uli na mutima wola nti eli na bumenyinino;
28 Ububo kungwa kikongolo eikala kibibi anabulwa buno eli na menge, mu nkungu zatakutenda nti es'abulwa buno eli na bumenyinino.