Kalaga akulola ku misako za muntu.
16
1 Lwango lwa mutima luli lwa muntu, tondo kwakula kwa kanua kukutukaga ku Yehowa. 2 Misako za muntu zikumutananizia we wenyene, tondo Yehowa akulindikaga mitima.
3 Bikila Yehowa milimo zobe, nu makengelo mobe malindibwe nunse.
4 Yehowa akukita binsania kuzindilizia makengelo mage, aba nu babi ku busi bwa lusungio.
5 Bantu ba lwikotio mu mutima tabatananizia Yehowa, lebelebe tababembuke lusungio.
6 Bwagi bukwengibagwa tugu ku kyombo nu bulili, nu bantu bakutukaga ku bubi ku buno bakukua Yehowa boba.
7 Kungwa misako za muntu zikutananizia Yehowa, nti amugomanizia na beiti bage.
8 Kuba na bikeke gamozi na bwisanana, kwatinga kuba na byingi geteli bwisanana.
9 Mutima wa muntu ukukengelaga tugu nzila zage, tondo Yehowa u gukusondelezia masomoneno mage.
10 Mwangati akutenda mu magala ma Yehowa, nu kanua kage takatunganana kwaga mu kwatula.
11 Makozi misanana ma kulindika meli ma Yehowa, ee, makozi mansania ma nsago meli mulimo wage.
12 Tabusoga bakota kukita bwagi, kubuno kisumbi kya bukota kyalindibwa na kwisanana.
13 Bakota bakubogaboga na bwisanana, nu bakutundaga wozo ukutendaga bulili.
14 Kongoa kwa mukota kuli anga mugenzi wa lukuo, tondo wozo uli na menge nti u wamubotye.
15 Kusana kwa kilungi kya mukota kuli kalamo, nu lutundo lwage luli anga lutundutundu lukulokya mbula.
16 Kuba na menge kuli kusoga nunse kutinga olo, ee, kusombola bumenyinino kuli kusoga kutinga feza.
17 Nzila nnene za wisanana zili kwibembukya na bwagi, wozo ukwisia nzila zage akonia kalamo kage.
18 Lwikotio lukwenda lwabusio lwa lusungio, nu mutima wa lwikotio gukulusia kugoa.
19 Busoga kuba na mutima wa kwibotya gamozi na buzambi, kutinga kubegana byanyagwa na bantu beli na lwikotio.
20 Wozo ukusongolola lebelebe bitondo nti akaswe busoga, nu wozo ukukatizia Yehowa abe na mbogimbogi.
21 Wozo uli na menge ma mutima abulwe buno eli na bumenyinino, nu busoga bwa kutenda bukutalikilaga menge.
22 Menge meli kanuabalongo ka kalamo ku babo beli namo, tondo meigisia ma bikongolo makubalusizia lusungio.
23 Mutima wa mwiya menge ukwigisagia kanua kage, nu ukutalikilaga meigisia ku milomo zage.
24 Moki masoga meli anga buuki, nu mbogimbogi ku mutima nu magala ku makwa.
25 Kuli nzila zikumoneka nsoga ku meiso ma muntu, tondo kuzinda kwazo kuli lukuo.
26 Wozo ukukita mulimo nti akwikitila wenyene, kubuno nzala zage zikumusindika kukita na komanizia.
27 Muntu mubi akukengelaga bubi kankanka, nu moki mansania mage meli anga keiya.
28 Muntu mubi akulingia nsake, nu nsongania akwanzukanagia bagomia.
29 Muntu mukali akutendaga munyage buteligo, nu kumusondelezia mu nzila ziteli nsoga.
30 Wozo ukuzibagazibaga meiso akukengela bitondo bibi, nu wozo ukwitwa ku milomo akutenda buteligo.
31 Itoe lyela mbwe lili nkumbu za lutanuno, kungwa zela mu bwisanana.
32 Na wozo utakusasia kongoa eli musoga kutinga wozo uli mubibu, nu wozo wangata mutima wage u musoga kutinga wakinda miino.
33 Mbale zikweswa ku mipimbo za nsulu, tondo iyakulo linsania lyazo likutuka ku Yehowa.