Kwengukana kwa menge nu bukongolo.
15
1 Kwakula kwabota kukugalukya bongoa, tondo kwakula na moki makali kukubakamizagia bongoa. 2 Kanua ka mwiya menge kakutendaga kwisanana, tondo tunua twa bikongolo tukutendaga bukongolo.
3 Meiso ma Yehowa meli kunsania, makulola musoga nu mubi.
4 Lulami lwabota luli muti wa kalamo, tondo kanua ka bwengelezi kakutambia mutima.
5 Kikongolo kikusombaga meigisia m'isi, tondo wozo ukungwilila lusungu eli na menge.
6 Mu numba za mwiya menge muli bikulo byingi, tondo mutali wa mwagi guli mu tubebe tugu.
7 Milomo za mwiya menge zikusambala menge, tondo mutima wa kikongolo tagukukitaga bubo.
8 Kisansa kya mwiya bwagi kili nsese ku Yehowa, tondo masego ma wisanana makumubogiabogia.
9 Nzila za mwagi zili nsese ku Yehowa, tondo masego ma wisanana makumubogiabogia.
10 Kuli lusungio lukali ku wazimina mu nzila, nu wozo ukusomba lusungu akue.
11 Kiziki kya bakuzi nu nsinda bili bwasi lwabusio lwa Yehowa, embe lino mitima za bantu.
12 Muntu wa kabenga ntakuziga kusungulwa, nu ntabasa bwigi na mwiya menge.
13 Mutima wa mbogimbogi ukumoneka ku kilungi kyasana, tondo kabebe kakutambia mutima.
14 Mutima wa mwiya bumenyinino ukulondaga menge, tondo kanua ka kikongolo kakulia bukongolo kankanka.
15 Bindi bya bakubabazibwa bili bibi, tondo wozo uli na mbogimbogi eli na kisagulo kankanka.
16 Kuba na bikulo bikeke gamozi na kukua Yehowa boba bwatinga kuba n'iguma lingi nu uli na tubebe kankanka.
17 Busoga kulia sombe geli lutundo kutinga kulia ngombe zanona gamozi na lusombo.
18 Muntu wa kasungu akulingia nsake, tondo mwiya nkiki akubotagia nsake.
19 Nzila za musosu zili anga mukolo wa mikele, tondo nzila za wisanana nti zatanuka.
20 Mwana wa menge akubogagiabogagia isi, tondo mwana kikongolo akubenga nina.
21 Bukongolo buli mbogimbogi za muntu wozo uteli na menge, tondo muntu wa bumenyinino akwendaga mu nzila zisanana.
22 Kuteli lwango takunakulungana bwampa, tondo ku bakazi beingi ba nango bukulongamana.
23 Muntu akubogaboga n'iyakulo isoga lya kanua kage, nu itenda lyatendwa mu nkungu zaswaga likubogiabogia nunse.
24 Nzila za kalamo zikwenda kwigulu ku mwiya menge, buno eibembukye na nsinda.
25 Yehowa akendula numba za mwiya lwikotio, tondo akulanga myaga za musigala.
26 Yehowa akusomba nunse makengelo ma babi, tondo misako za kumutananizia zili misoga.
27 Wozo ukutunda tugu mutali wage akubabazia kikanga kyage, tondo wozo ukusomba lukaso lubi akalama.
28 Mutima wa wisanana ukutundaga kukengela bwaakule, tondo kanua ka mubi kakutendaga bitondo byingi bibi.
29 Yehowa eli bulazi na mwagi, tondo akungwaga masego ma wisanana.
30 Kyengi kya meiso kikubogagiabogagia mutima, nu musagu musoga ukukasa magala ku makwa.
31 Kutuzi kukungwilila lusungu lwa kalamo, nti kwikala munkatini mwa beiya menge.
32 Na wozo ukusomba meigisia nti akwibenga wenyene, tondo na wozo ukungwilila lusungu nti eli na menge.
33 Kukua Yehowa boba buli meigisia ma menge, nu kwibotya kukuvwa lwabusio lwa lwanzo.