Menge nu bulili bikuganunagwa.
14
1 Mukikulu musoga akobaka numba zage, tondo kikongolo akuzisambulaga na maboko mage wenyene. 2 Wozo ukukita bwisanana nti akukua Yehowa boba, tondo wozo uli na myango kankanka nti akumubenga.
3 Mu kanua ka kikongolo muli kasusu ka lwikotio, tondo kutenda kwa beiya menge kukubalanga.
4 Kungwa mu mukumba tamuli ngombe nti tamuli kena, tondo ku magala ma ngombe kukutuka matubulo mengi.
5 Mulongeki wa bulili ntakutendaga buza, tondo mulongeki wa buza akwekaga buza kankanka.
6 Wozo mwiya nguza akulondaga menge nu nti ntamamone, tondo mwiya bumenyinino akusasia kukata menge.
7 Tuka geli kikongolo, kubuno ntwamone ku bumenyinino mu kanua kage.
8 Bumenyinino bwa mwiya menge buli kusongolola nzila zage, tondo bukongolo bwa bikongolo buli bwengelezi.
9 Bikongolo bikukita nguza ku bwagi, tondo kyelamo kyili ku beisanana.
10 Mutima wizi kabebe kago, nu mugeni ntabe na mbogimbogi zago.
11 Numba za mwiya bwagi zasambulwe, tondo numba za hema za wisanana zemane na magala.
12 Kuli nzila zikumoneka nsoga ku meiso ma muntu, tondo kuzinda kwazo kuli lukuo.
13 Muntu anaseka nu kasi eli na kabebe mu mutima, nu kuzinda kwa mbogimbogi kuli kabebe.
14 Muntu wozo ukusubania lumbusambusa nti eikute mu nzila zage, nu muntu musoga eikute na misako zage.
15 Kikongolo akwitabizagia nabo nabo, tondo mwiya mwenge akutitika bwakwenda.
16 Muntu mwiya menge akukuaga Yehowa boba nu kwibembukya na bubi, tondo mubi eli na kabenga nu kwikengelaga wenyene.
17 Na wozo ukusasia kongoa nti eli kikongolo, nu na wozo uli na makengelo mabi nti akusombwa.
18 Bikongolo bakupienaga bukongolo, tondo beiya menge bakubikagwa nkumbu za bumenyinino.
19 Bagi bakumbe mazu lwabusio lwa beisanana, nu babi bakumbe mazu ga nibi za beisanana.
20 Muzambi akusombagwa aba nu na munyage, tondo mugumi eli na bilemba byingi.
21 Nu wozo ukubenga munyage nti akwaga, tondo wozo ukukwila muzambi kyombo eli na mbogimbogi.
22 Babo bakulondaga kukita bubi ndi tabakwagaga? Tondo kyombo nu busoga buli ku babo bakukengela busoga.
23 Na mulimo na mulimo guli na mutali, tondo bitondo bya kanua bikulusagia tugu muzambo.
24 Iguma lili nkumbu za lutanuno za mwiya menge, tondo bukongolo bwa kikongolo buli bukongolo tugu.
25 Mulongeki wa bulili akonagia bango, tondo mulongeki wa buza akutenda bwengelezi tugu.
26 Kukua Yehowa boba kuli kilemanizio kyalinda, nu bana bage nti babe n'itinino.
27 Kukua Kalaga boba buli kanuabalongo ka kalamo, nu kuli kwiyonia ku matega ma lukuo.
28 Lutanuno lwa mukota luli kuba na bantu beingi, tondo kukega kwa bantu kuli kubiga kwa mukota.
29 Nu mwiya nkiki eli na menge nunse, nu wozo ukusasia kongoa akulolesia bukongolo.
30 Mutima wabota guli kalamo ka mubili, tondo lugi luli anga makwa mabola.
31 Wozo ukubenga bazambi nti akwililika Mubumbi wage, tondo wozo ukumukwila kyombo akumwanza.
32 Bubi bwa mwagi bukumubika gansi, tondo wisanana eli n'itinino aba nu mu lukuo lwage.
33 Menge makwikalaga mu mutima wa mwiya bumenyinino, tondo makengelo ma kikongolo makusasia kumenywa.
34 Kwisanana kukusakika kilongo, tondo bubi bukwinagia bantu bansania mitima.
35 Mukota akutundaga mukiti wozo ukukita na menge, tondo akongelagwa wozo utakukita busoga.