Misako za beiya menge nu za bikongolo.
13
1 Mwana wa menge akungwililaga meigisia m'isi, Tondo wozo mwiya kabenga ntakungwaga lusungu. 2 Na biguma bya kanua kage muntu akwidisia busoga, tondo bitondo bya beiya kabenga nti bili nsake tugu.
3 Wozo walanga kanua kage nti akulanga kalamo kage, tondo wozo mutenditendi akate lusungio.
4 Mutima wa musosu ukutunda, tondo ntabe na kena, tondo mutima wa wozo mwenge nti ukwikuta kankanka.
5 Muntu wisanana akusombaga kweka buza, tondo muntu mubi akusombwa nunsania nu abe na nsoni.
6 Bwisanana bukulangaga mwiya bulili, tondo bubi bukuzimizia mwiya bwagi.
7 Kuli muntu wozo ukwidolesia buno eli mugumi tondo nteli na kena, nu kuli ungo ukwidolesia buno eli muzambi, nu eli mugumi nunse.
8 Bukuluzi bwa kalamo ka muntu buli bikulo byage, tondo muzambi ntakwanza mano.
9 Kyengi kya mwiya bulili kikusanagia, tondo kasuku ka mwagi kazime tugu.
10 Lwikotio lukulusagia nsake, tondo menge meli ku babo bakusungulana.
11 Bugumi bwamoneka mu bwengelezi nti tabwitile, tondo wozo ukukundamania bikulo na menge atalikile.
12 Kilemanizio kya kwizizia kikusambia mutima, tondo nkungu zabasa kikyo kyalemaninwa kili anga muti wa kalamo.
13 Muntu wozo ukubenga idagi azimine, tondo wozo ukwanza makakizio abe na lukalilo.
14 Milembe za beiya menge zili kanuabalongo ka kalamo, kwibembukya na matega ma lukuo.
15 Bumenyinino busoga bukulusagia mponga, tondo nzila za bengelezi zili za kukikitania.
16 Mwiya menge akukita na bumenyinino, tondo kikongolo akulolesagia bukongolo bwage tugu.
17 Musingwa mubi akukindagwa na bwagi, tondo musingwa wisanana eli na magala.
18 Buzambi nu nsoni bikubezaga ku wozo ukusomba meigisia, tondo wozo ukwitabizia kusungulwa nti anzwe.
19 Kumona kikyo kyatundagwa bukubogiabogia nunse mutima, tondo bikongolo bikwina mutima kulekanuka na bwagi.
20 Enda gamozi na mwiya menge nu uwe nti wabe na menge, tondo mwida wa bikongolo ababalwe bwatugutugu.
21 Bubi bukuyangaga bagi, tondo beisanana bakaligwa busoga.
22 Muntu musoga akusigaga ntiko zage ku bayukulu bage, nu bugumi bwa mwagi bwabikilwe ku beisanana.
23 Idia likumoneka lyingi mu isoa lya muzambi, tondo kuli lyingi lyazimina ku kabamba ka buteisanana.
24 Wozo utakususula mwana wage nti ntamutunda, tondo we ukutunda mwana wage akumusungula nkungu na nkungu.
25 Wisanana akuliaga nu akwiyikutia, tondo nda za mubi zikulaka nzala kankanka.