MISUMO
Kukua Kalaga boba kuli kulinga kwa menge
1
1 Misumo za Solomono mwana wa Davidi, mukota wa Israeli. 2 Kumenya menge nu meigisia, kusongolola bitondo bya bumenyinino; 3 Kwigisia misako za menge mu kwisanana, nu lusungio nu bulili. 4 Kukasa bikongolo menge, kukasa musikila kumenya menge;
5 Buno muntu wa menge ongwe, nu muntu wa bumenyinino ongwilile nango za menge masoga. 6 Kusongolola misumo nu bwisulilwa bwazo, bitondo bya beiya menge nu mingu zabo.
7 Kukua Yehowa boba kuli kulinga kwa menge, tondo bikongolo bakwililika menge nu meigisia.
8 Mwana wane, ungwilila meigisia ma so, nu ntusige meigisia ma nyoko. 9 Kubuno zabe nkumbu za mponga ku itoe lyobe, nu mwambalo mu ikosi lyobe.
10 Mwana wane, ndi beiya mibi bakukuluta, ntwitabizie. 11 Ndi batenda bunee: “Vwa gamozi n'iswe, buno tubasie mikila, tukobele wozo uteli na katati, geteli kabamba, 12 tubamene beikibalama anga bukugela bakuzi bansania mu nsinda, nu bagimagima anga bubagela mu nsinda. 13 Twamone bikulo binsania bya bukunza busoga, twizazie numba zeitu na bya babo bakwitwa. 14 Wagomie na beiswe bansania, beiswe twabe na bintu binsania gamozi.”
15 Mwana wane, ntwende mu nzila gamozi nabo, zugila kugulu kwobe buno takwende mu kutabanga kwabo. 16 Kubuno magulu mabo makusasia kwenda ku mibi, nu bakusasia kukubula mikila. 17 Tondo bukila bukutegwa buliabulia lwabusio lwa kazoni na kazoni. 18 Nu babano bakulanga mikila zabo, bakubisa kalamo kabo. 19 Ububo buli nzila za muntu na muntu ukwelama bikulo, zikutikya kalamo ka beli nabyo.
20 Menge makulila mu milungu, makulaluka n'iyuki mu nzila nnene. 21 Makulila kuli misanganano ga miingilo, nu mu mwino makusambala bitondo byamo. 22 Inyuwe bikongolo, aaba ku nkungu nkizi mwatunde bukongolo? Nu inyuwe beililiki, aaba ku nkungu nkizi mukutunda kwililika, nu bikongolo kusomba menge? 23 Galukazi ku kwana kwane, lolazi, nakubule mutima wane kumuli, nu kumumenyesia moki mane.
24 Kubuno namanine, nu inyuwe mwasombile, nalambizie kuboko kwane, takuli muntu walolile, 25 Kubuno mwasombile lwango lwane lunsania, nu tamwatundile kwana kwane, 26 Nu nne naseke ku bindi bya tubebe tweinyu, namukite nguza nkungu zimwakue boba, 27 Nkungu zamubasile boba anga lukuo, nu kuzika anga lumpumpu lwa kapilipili, gamuvwile nsungio nu mbabazio.
28 Ububo bammane, nu nsyakule, bandonde nu tabammoneko. 29 Kubuno basombile menge, nu tabasombwede kukua Yehowa boba. 30 Kubuno tabatundile lwango lwane, nu bakubenga iyano lyane linsania. 31 Ku bubo balie biguma bya makitilo mabo bobenyene, nu beiyazibwe ku nango zabo bobenyene. 32 Kubuno kuzimina kwa bikongolo kukubeita, nu kumunwa kwa bikongolo kukubazikya. 33 Tondo muntu unsania ukunnungwa eikale na bubobelelo, omunwe; ntakue bubi boba.