Mponga za kulonda menge.
2
1 Mwana wane, kungwa wanza bitondo byane, nu kulanga makakizio mane, 2 ububo watege kutuzi kwobe kungwilila menge, nu kumakengela mu mutima wobe, 3 ndi watunda kumenyinina nunse, nu kutunda kumenya menge, 4 ndi ukumalonda anga bikulo, nu ndi ukumalondalonda anga isuku isoga lyabisilwe, 5 nti wamenyinine kukua Yehowa boba, nu kumona menge ma Kalaga. 6 Kubuno Yehowa akukasaga bantu menge, mu kanua kage mukutukaga bumenyinino nu bwenge. 7 Akubikilaga babo beisanana mbiso za menge, We eli ngabo za babo bakutabangaga mu bwisanana, 8 buno alange matingilo ma beisanana, nu kulanga nzila za basililila bage. 9 Ububo buwamenyinine kwisanana nu lusungio, nu bulili mu nzila nsoga insania. 10 Kungwa menge meingila mu mutima wobe, nu bumenyinino bwatananizia kalamo kobe. 11 Lwango lunakukasia, nu menge makakulanga. 12 Manakutikya mu bwagi, nu makakulanga na bantu bakutenda bitondo bibi, 13 nu na babo bakusiga nzila zisanana, nu kwenda mu nzila za kapilo, 14 nu kubogaboga na kukita bubi, nu kutananizibwa na buzimizi bwa bagi, 15 nu nzila zabo zatimba, nu bakwenda mu nzila za bwengelezi.
16 Manakwonia ku mukikulu mugeni, wozo ukukwengelela ku moki mage. 17 Ukusiga kilemba kyage kya bwana bwage, nu ukwibilila idagano lya Kalaga wage. 18 Kubuno numba zage zetamina ku lukuo, nu matingilo mage makwenda ku bakuzi. 19 Takuli ukusubya ku babo bakumwendela, aba kubasa lingo mu nzila za kalamo.