Menge meli na mutali.
3
1 Mwana wane, ntwibilile meigisia mane, nu mu mutima wobe langa makakizio mane. 2 Kubuno makutalikile bindi, Nu myaka za kalamo kobe mu mponga nu bulili. 3 Kyombo nu bulili tabituke kuguli, bikande mu ikosi lyobe, nu bisanze mu mutima wobe. 4 Ububo buwamone mbiso za menge masoga, ku Kalaga nu ku bantu. 5 Katizia Yehowa na mutima wobe unsania, nu ntwegamine ku menge mobe uwenyene. 6 Mumumenyinine mu nzila zobe insania, nu We akusondelezie mu nzila zobe.
7 Ntube mwiya menge ku makengelo mobe uwenyene, kua Yehowa boba, nu nti wibembukye na bubi. 8 Bubo bwabe idunda mu misuna zobe, nu mungongo mu makwa mobe.
9 Anza Yehowa na bikulo byobe, nu idia litangi lya matubulo mobe mansania. 10 Nu bigenge byobe biyazibwe, nu ndego zobe ziyale n'ituba isoga.
11 Mwana wane, ntubenge kusungula kwa Yehowa, nu ntukutwe na mano mage kungwa akusungula. 12 Kubuno Yehowa akusungulaga wozo waatunda, anga isi wa mwana bwakusungulaga mwana waatunda.
13 Mbogimbogi ku wozo muntu uli na menge, nu muntu wozo uli na bumenyinino. 14 Kubuno bikulo byage bili bisoga kutinga bikulo bya feza, nu mutali wage guli musoga kutinga olo nsoga. 15 Nu menge meli masoga kutinga makozi ma bukunza ma akiki, nu binsania bikutundwa tabigezye na menge. 16 Bindi byingi bili ku kuboko kwage kwa seidume, nu ku kuboko kwage kwa seikazi kuli bugumi nu lwanzo. 17 Nzila zage zili nzila nsoga, nu matingilo mage meli bubobelelo. 18 Menge meli muti wa kalamo ku babo bansania bakumukata, nu mbogimbogi ku babo bansania basigala namo.
19 Kisi kyabumbilwe na menge ma Yehowa, ku bwenge bwage ukwakitide meigulu. 20 Ku menge mage abeganizie bitatenge, ububo bimpa bikulokya mbula.
21 Mwana wane, iyano lilyo talituke mu makengelo mobe. Kokomezia menge nu bumenyinino. 22 Byabe kalamo mu kalenganio kobe, nu malebo mu ikosi lyobe. 23 Nu bubo wende mu nzila zobe busoga, nu kugulu kwobe takwikuke. 24 Mu kwiyombeka ntwakue boba, nu ndi wiyombeka walengelelwe ku tulo. 25 Ntube na mpipi ku boba bwa kitangalabesi, aba bubi bunsania bukutuka ku babi. 26 Kubuno Yehowa abe kilemanizio kyobe, nu alange kugulu kwobe buno takukikitanwe.
27 Ntwime mponga ku bantu batananina, ndi uli na byakubakasia nti u buukita. 28 Ntubule munyobe buno enda tanga, lubi u bunakukase, ndi uli na kyakumukasa kano kaluma.
29 Ntukengelele munyobe bubi, wozo wikala nobe mu bubobelelo. 30 Ntwende na muntu myango kungwa ntuli nage kitondo, nu ndi ntakusuna.
31 Ntube na lugi ku muntu uli na kabenga, nu ntusombole nzila emozi ku zage. 32 Kubuno Yehowa akusomba bantu bakali, tondo eli gamozi na bantu beisanana.
33 Kiswililo kya Yehowa kili ku babo bagi, tondo akukasa beisanana mponga.
34 Yehowa akwililika beililiki, nu akukasa babo babota mponga.
35 Beli na menge bakapiena lutanuno, tondo bikongolo bakaba na nsoni.