Buli busoga kuba na menge.
4
1 Bana bane, ungwililazi iyano lya soinyuwe, ungwililazi buno mumenye menge. 2 Kubuno nkumukasa meigisia masoga, tamwibilile mulembe wane. 3 Nu nne nabezaga mwana mutundwa wa tatane, nu ngoli za mmane. 4 Anigisizie nu ambwide bunee: “Mutima wobe ukengele moki mane, nu kulanga meigisia mane, nu walame. 5 Ba na menge nu ba na bumenyinino, ntwibilile nu ntusombe bunakutenda. 6 Ntumasige, numo makulange, umatunde, numo makulange. 7 Menge meli kitondo kinene nunse, ububo ba na menge, nu gamozi na binsania biguli nabyo ba na bumenyinino. 8 Kungwa wabukutya, nubo nti bwakusakike; ndi wabwitabizia, nti wanzwe ku kabamba kabo. 9 Bwakukase malebo ma mponga ku itoe lyobe, nu kukukasa lukalilo lwa lutanuno.”
10 Mwana wane, ungwilila nu kwanza nango zane, nu myaka za kalamo kobe zabe mingi. 11 Nkukwigisia nzila za menge, nu kukusondelezia mu matingilo meisanana. 12 Kungwa ukwenda masomoneno mobe tamabiganwe, nu kungwa ukwituma lubilo ntunakikitanwa. 13 Ikokomezie mu iyano lilino, ntulisige, lilange, kubuno lili kalamo kobe.
14 Ntwende mu nzila za bagi, aba kwenda mu nzila za bantu babi. 15 Ibembukye nazo, nu kutinga mu engo nzila. Wende bulazi na nzila za babi. 16 Beiya bwagi tabakwiyombeka ndi tabakita bubi, nu bakwida tulo kungwa tababigia muntu. 17 Kubuno mibi zili idia lyabo, nu bwiti u mazi mabo ma kunua.
18 Tondo nzila za beisanana zikusana anga isase lya busi, likuvwa nu kusana nunse. 19 Babo bakwendaga mu bwagi bakwendaga mu kapilo, nu tabeizi kikubakikitania.
20 Mwana wane, ungwilila ku moki mane, tega kutuzi kwobe ku binkutenda. 21 Tamatuke ku makengelo mobe, nu kokomeziamo mu mutima wobe. 22 Kubuno meli kalamo ku babo bakumakata, nu magala ku mubili wobe unsania.
23 Langa mutima wobe kutinga binsania byukulangaga, kubuno u mukubasa kanuabalongo ka kalamo.
24 Ntutende moki mabi, nu bika bwengelezi bulazi na milomo zobe.