Lusungu ku kabamba ka butazi.
5
1 Mwana wane, ungwilila menge mane, nu ungwilila bumenyinino bwane. 2 Buno ulange lwango nu milomo zobe zilange bumenyinino 3 Kubuno mu kanua ka mukikulu mugeni, mukutukaga moki meli anga buuki, nu kanua kage keli lugola anga makiti. 4 Tondo kuzinda kwage nti eli anga kiguma kili ngigi, nu bukali anga mwene wa ntungo ibili. 5 Magulu mage makusondelezia ku lukuo, nu masomoneno mage malolela ku nsinda. 6 Ntakwenda mu nzila za kalamo; nzila zage zili za kuzangazanga, nteizi kwakwenda.
7 Bana bane, ububo ungwililazi, nu tamwibilile bubo bunamubula. 8 Bembuka bulazi nzila zage, ntukunde lwibi lwa numba zage. 9 Gunavwa kukasa bango mpumba zobe za mubili, nu kukasa bikongolo myaka zobe. 10 Bageni banavwa kutola magala mobe, nu mutali wa mulimo wobe unavwa kwenda ku bango. 11 Nu kusila kwa bubo walilile magala mobe, nkungu zazika makwa nu mubili wobe. 12 Nu kutenda bunee: “Buni bunasombaga meigisia, nu mutima wane wasombile iyano. 13 Nu nsyanzile meigisia ma basozi bane, aba nsyungwilide ku binsania bibanigisagia. 14 Nabezaga nunse bwigi na kuzikibwa, munkatini mwa musanganano.”
15 Nua mazi ma muloba wobe uwenyene, nu mamo makutuka mu kanuabalongo kobe. 16 Ndi busoga mazi ma tunuabalongo twobe mabalangane kunsania, nu mazi ma nuuzi mu mulungu? 17 Mabe mobe uwenyene, tamabe ku bageni.
18 Kanuabalongo kobe kakaswe mponga, nu bogaboga na mukikulu wa busikila bwobe. 19 Anga ibuti lya mubale nu lya kaseti; bubo u bubo mabele mage makubogiebogie mu nkungu insania, nu bogaboga nunse na lutundo lwage. 20 Mwana wane, buni buukwibogiabogia na ungo mukikulu, nu bukuba bwobe bukulandana na bwa mukikulu mugeni?