Nsungu ku kabamba k'idungia
6
1 Mwana wane, ndi walumbile ku munyobe buno walige nsombi zage, nu ndi wakasana kuboko na mugeni, 2 nti wakindwa ku bitondo bya kanua kobe, nu wakatwa mu kutenda kwobe; 3 mwana wane, umpanga bubuno u buukita buno wiyonie, kubuno wibika ku munyobe; enda wibotye ku mwida wobe nu kumusegasega. 4 Ntutunde tanga kwiyombeka, aba kuzenzela takukuvwile; 5 tondo iyonie tanga, anga bukwiyonia mubale ku maboko ma mutengi, nu anga bubo bukusogonyokaga kazoni mu maboko ma mutegi wa mansilia. 6 Uwe musosu, enda tanga bwigi na kinkete, nu lola tanga bukikukita, nu wabe na menge. 7 Kubuno takili na mukota, aba musondelezia aba mwangati; 8 tondo kikwidondelaga idia mu nkungu za kilimo, nu kikwikungikilaga idia mu nkungu za matubulo. 9 Tondo, uwe musosu, nkungu nkizi ziwiyombeke muzo? Nu nkungu nkizi ziwayuke? 10 Kwiyombeka kakeke nu kuzenzela kakeke, nu kukumba minwe buno wiyumuzie, 11 nti buzambi bwasasie kukubasila anga munyagi, nu kwiyanina kwobe anga muntu uli ku bita.
12 Muntu mwagi u wozo mubi akwendaga kankanka mu bukongolo bwa kanua kage; 13 akukebya meiso nu kutenda na magulu mage, akutenda tugu na minwe zage. 14 Mutima wage wiyala na mibi, akutunda bubi kankanka nu akuyukya nsake. 15 Ububo lusungio lwasasie kumubasila kitangalabesi, nu nti akue kitangalabesi, ntamona konibwa.
16 Kuli misako mutuba zikusomba Yehowa, tondo zili mutubakamo zili nsese nunse kweli. 17 Meiso ma lwikotio, nu lulami lukweka buza, nu maboko makukubula mikila ziteli na katati, 18 nu mutima ukukengela bubi, nu magulu makusasia kuyangilila kukita bubi, 19 nu mulongeki wa buza utakulongeka buligo, nu wozo ukubika misona gasamba mibuto.
20 Mwana wane, ungwilila makakizio ma so, nu ntusige iyano lya nyoko; 21 malindike nunsania, mabike mu mutima wobe, nu iyambikemo mu ikosi lyobe; 22 Kubuno makusondelezie kunsania kuwendage, nu makulange kunsania kungwa use wiyombeka, nu kungwa use wayuka, nti makusondelezia kunsania. 23 Kubuno makakizio mamano meli kasuku, nu mulembe wono guli kyengi, nu lusungu nu meigisia meli nzila za kalamo.
24 Makulange na mukikulu kitazi, nu na lulami lwa bwengelezi bwa mukikulu mugeni. 25 Ntuyange bumbangilwa bwage mu mutima wobe, nu ntubongwe nunse na kulengula kwa meiso mage. 26 Ku kabamba ka mukikulu kitazi muntu abe muzambi nu alie idia likeke tugu; bubo u buli mukikulu kitazi kungwa es'atunda kutegela wozo musoga. 27 Ndi muntu anabika makala ma keiya ga bukuba, ndi nsulu zage tazinagia? 28 Aba ndi muntu ananyanta ga makangania meli na keiya, Ndi kugulu kwage takunagia? 29 Ububo buli muntu ukwendela mukazi wa munyage, nu wozo witubya kweli nti akasungibwa nunse.
30 Bantu tabakubenga mwibi, kungwa akwiba buno embuke tugu ndi akukua na nzala; 31 Tondo kungwa akatwa, nti alige mambizi mutubakamo, nu kulusia byage binsania.
32 Wozo walimbia mukikulu nteli na menge, nti alondaga tugu bwanasungibwa, nu nti akita bubi nunse. 33 Nti akulibulwa nu kuba na byulu, nu nsoni zage tazinasila. 34 Kubuno lugi lukuyukya bongoa bw'iba wage, nu ntanasigilila ku busi bwa kwisuba, 35 nu ntanaziga bukuluzi bwabo bunsania, nu ntabote aba wamukasa nkaso ningi.